Ноябрь 20-де Э.М. Примаков аттыг гимназияга Бүгү-россияның ада-иелер комитединиң ийиги хуралы болуп эрткен. Аңаа ада-иелер ниитилелиниң бот-идепкейлер мөөрейиниң түңнелдерин үндүрүп, тиилекчи төлевилелдерни адаан, ол ышкаш органның ажылының мурнады көөр угланыышкыннарын тодараткан.
Россия Федерациязының 78 субъектизинден 200 ада-ие комитеди, ооң иштинде Тыва Республикадан 2 комитет төлевилелдерин боттандырарынга акша шаңналын алыр. Мөөрейни РФ-тиң Өөредилге яамызының деткимчези-биле Россияның “Билиглер” ниитилели организастаан.
Тожуда Л.Б. Чадамба аттыг Доора-Хем ниити өөредилге школазының ада-ие комитединиң бот-идепкейжи жюриниң бедик үнелелин ап, 500 муң рубль акша шаңналын алган. «Тожу: өг-бүле болгаш культуразы» өг-бүле фестивалының төлевилели «Сагыш-сеткил мөзү-бүдүш кижизидилгези» номинацияга тиилээн. Фестиваль тожуларның аңгы-аңгы салгалын культура өнчүзүнүң темазы-биле каттыштырар: уруглар болгаш улуг улус национал ус-шеверлелдиң мастер-класстарынга киржип, иви малдың сүдүнден аъш-чемни белеткээрин шиңгээдир.
“Күш-ажыл кижизидилгези” номинацияга республиканың база бир төлевилели – Сүт-Хөл кожууннуң Суг-Аксы школазының “Ада-иениң этно-мастерскаязы” тиилээш, 500 муң рубльге төлептиг болган. Авторларның бодалдары-биле 5–11 класстың өөреникчилери ада-иелеринден аът дериг-херекселдерин, тыва хөгжүм херекселдерин база бажың эдилелдерин кылып өөренир.
Россия Федерациязының чырыдыышкын сайыды Сергей Кравцов Бүгү-российжи ада-ие комитединиң хуралынга киришкеш, сөөлгү чылдарда ада-иелер ниитилелиниң өөредилге болгаш кижизидилге чорудуунга ролюнуң улгатканын демдеглээн.
«2040 чылга чедир бурунгаар көрүш-биле 2036 чылга чедир өөредилгени хөгжүдериниң стратегиязын ажылдап эгелээн бис. Программа документизиниң ачызында ниити сорулгалар болгаш сайзырал угланыышкыннарының дугайында ада-иелериниң, башкыларның болгаш школа директорларының ниити билиишкини хевирлеттинер. Бүгү-российжи ада-иелер комитеди тургустунган, ынчангаш угланыышкыннар аайы-биле стратегияны белеткээринге ажылчын бөлүктерниң киржикчилери силерниң киржилгеңерге идегеп турар бис. Бо ажылга ада-ие комитединиң кежигүннериниң киржилгези чугула» — деп, Сергей Кравцов демдеглээн.
“Билиг” российжи ниитилелдиң чиңгине директору Максим Древаль Бүгү-российжи ада-ие комитединиң бадылаан Ада-иелер ниитилежилгезиниң эгелээшкиннериниң бирги мөөрейиниң тиилекчилер даңзызын дыңнаткан. Максим Древаль 2025 чылда мөөрейниң ийиги сезону болурун чарлаан.
ТР-ниң Чазааның парлалга албаны.
«Шын» №90 2024 чылдың ноябрь 23
