Тываның Баштыңы Владислав Ховалыг долу эвес мобилизация-биле Тывадан кыйгырткан шериг оолдарга 100 муң рубль дузаламчы акшаны чаңгыс удаа төлеп бээр шиитпир хүлээп алдынганын дыңнаткан.
«Белен эвес шиитпир болду – өске улуг субъектилерге деңнээрге, республикавыстың бюджединиң арга-шинээ шоолуг эвес дээрзин билир болгай силер. Ынчалза-даа Ада-чуртту камгалаары-биле чоруп турар шериг оолдарывыска деткимче турар ужурлуг.
Кыйгырткан оолдарывыстың кижи бүрүзүнүң ат-сывын билир бис, ынчангаш артык саазын-документ, билдириишкиннер негеп турбайн, төлевирлерни дорт боттандырыптар бис.
Хүн бүрү тускай шериг операциязында киржип турар болгаш бо чаа мобилизастаттынган оолдардан кээп турар хөй санныг дилег, билдириишкиннер-биле ажылды чорудуп тур бис. Ынчангаш чаңгыс аай штавывысче яамылардан тускай специалистерни төлээ кылдыр ажылдадып чорударын даастым. Кирип турар айтырыгларга дарый билдингир, тода харыыларны берген турар ужурлуг.
Тускай шериг операциязының киржикчи бүрүзү «чаңгыс көзенек» дүрүмү езугаар деткимчениң бүгү хевирин алган турар ужурлуг. Кадык камгалал яамызының кичээнгейин санаторлуг-курорт эмнээшкинин организастап тургаш, Камгалал яамызының шериг албан-хүлээлгелиглерге азы Росгвардияның ажылдакчыларынга онаашкан чиигелделерже кирбейн турар эки турачыларны база тускай аңгылаар айтырыгже углаарын даастым. Оон аңгыда улуг улуска болгаш ажы-төлге шынарлыг психологтуг ачы-дуза чедирилгезин организастаары чугула. Оларның боттарының долгап келирин манап олурбайн, социал албан черлери боттары үнүүшкүннерни кылып, өг-бүлелер-биле ужуражыры чугула» - деп, Владислав Ховалыг медеглээн.
Тываның Баштыңы тускай шериг операциязының мурнуку одуруунче немелде техниктиг дериг-херекселдер саткаш, чорудар ажылды уламчылап турарын чугулалап айыткан. Ук ажылды чорударда тускай шериг операциязы эгелээнинден тура 55-ки мотоадыгжы (даг) бригадазы-биле база Төп шериг округу-биле сырый харылзаалыг болуп турарын Владислав Ховалыг дыңнаткан.
