Тываның Баштыңы 55-ки гвардейжи мото-адыгжы бригаданың шериг албанныгларының дилээ-биле тудуг материалдарын база дизельдиг генераторну сатканын дыңнаткан. Регионнуң «Деткимче» фондузунда чыгдынган акша-хөреңгини ажыглап, дузаны чоруткан. Материалдарны болгаш дериг-херекселдерни Донда-Ростов хоорайга чедирген.
«Дайынчыларывысты деткиирин, оларның дилеглерин күүседирин кызыдар бис. Чоокта чаа олар тылдың инфраструктуразын өскээр көжүреринге херек тудуг материалдары садып алырынга дузалажырын дилээн. Шериглер чаңгыс черге турбас: тулчуушкуннар болуп турар бир черден өске черже көжүп чоруурлар. Ооң-биле кады аъш-чем, чурттаар черин, эмчи дузазын болгаш дыштанылгазын хандырып турар албаннар кады шимчеп чоруптар» - деп, В.Ховалыг бодунуң блогунда тайылбырлаан.
Шериг албанныглар чиик болгаш быжыг ОСБ-плиталарны садып бээрин дилээннер. Дайынчылар тыл албаннарынга көжүп чоруур хоргадал чери кылдыр тударынга ону ажыглаар планныг.
«Деткимче» фондузунуң акша-хөреңгизи-биле Донда-Ростов хоорайга 5000 ОСБ-плиталарны болгаш амгы үениң үш фазалыг 20 кВт дизельдиг генераторун садып алган.
Шериг албан чериниң начальнигиниң дыңнатканы-биле алырга, 55-ки гвардейжи мото-адыгжы бригаданың материалдыг хандырылга албаны бистиң шериглерниң турумчуур черлеринге чедир тудуг материалдарын сөөртүрүн хандырган. Генераторну удавас чорудар.
"Оолдарывыс идегелдиг ынаныш база деткимче барын билип чорууру биске чугула" - деп, Владислав Ховалыг демдеглээн.
«Деткимче» фондузу 2022 чылда тургустунган. Тускай шериг операцияларының зоназында шериг албанныгларны деткиири – фондунуң ажыл-чорудулгазының бир угланыышкыны. Тускай шериг операциязының киржикчилерин деткииринге үлүг-хуузун киирип турар бүдүрүлгелерден, бизнестен, организациялардан база чаңгыс чер чурттуглардан ачы-дузаны фондуда чыып турар.
Тываның шериг албанныгларының дилээ ёзугаар фондунуң саң-хөө деткимчези-биле 2024, 2023, 2022 чылдарда ТШО зоназынче чүгле техниктиг дериг-херекселдерни эвес, а Донбасстың тайбың чурттакчыларынга гуманитарлыг дузаны чедирип турар.
ТР-ниң Чазааның парлалга албаны.