Тускай шериг операциязының киржикчилери башкы угланыышкынныг дээди өөредилге черлеринге профессионал билиг-мергежилге өөредилгени, эде белеткелди база билиглерин бедидип өөренир аргалыг. Чырыдыышкынның күрүне университеди-биле «Ада-чурт камгалакчылары» күрүне фондузунуң кады ажылдажылга дугайында керээзинге даянгаш, баштайгы беш дайынчы өөредилгени эрткен, ам сентябрьның 16-да ийиги агым эгелээр.
Россияның Чырыдыышкын яамызының даалгазы езугаар, дээди өөредилге чериниң баазазында «Вершина» шериг-патриотчу кижизидилге төвүнде өөредилге чорудуун организастаан. ТШО хоочуннарын «Төрээн чурттуң айыыл чок чоруунуң база камгалалының эге билиглери» деп чаа эртемни башкылаарының методиказынга, ол ышкаш школаларның шериг-патриотчу клубтарынга ажылдаар кылдыр оларның арга-мергежилин экижидер.
Фонд өөредилге албан черлери-биле кады, улаштыр диплом алган хоочуннар каяа ажылдаарын билген турар кылдыр, өөредилгени организастаар. Көдээ суурларга, бичии хоорайларга база эвээш чурттакчылыг черлерге программа дыка херек болганда, тускай сорулгалыг чыылданы чорудар.
Тывада «Ада-чурт камгалакчылары» регионалдыг салбырның тайылбырлааны болза, профессионал эде белеткел программазы стажка негелде чокка, дээди эртемниг специалистерге база дээди өөредилге черлериниң улуг курстар студентилеринге санаттынган. Чедиишкинниг өөренип дооскан соонда, «Төрээн чурттуң айыыл чок чоруунуң база камгалалының эге билиглери» квалификацияны тывыспышаан, профессионал эде белеткел дугайында дипломну холунга бээр.
Өөредилге 3 ай азы 256 академиктиг шак ишти болур. Ырактан шиңгээттирер өөредилге технологияларын ажыглавышаан очно-заочно өөренип болур.
Башкы мергежил чедип алыксаан кижилер университеттиң сайтызынче азы «Ада-чурт камгалакчылары» күрүне фондузунуң тыва салбырынче билдириишкинни боттары киирер. ТШО-да амгы киржикчилер база оон халашкан кижилер өөренип болур.
ТР-ниң Чазааның парлалга албаны.
