Тывада ортумак профессионал өөредилге албан черлеринде хүлээп алыышкын кампаниязы эгелеп, үш муң ажыг оолдар, кыстарны хүлээп алырынга белен. "Профессионалитет" федералдыг төлевилел программазы-биле 490 кижи мергежилдерге өөренип алыр аргалыг.
РФ-тиң Чырыдыышкын яамызының экономиканың боттуг секторунуң чугула хереглелдери езугаар тускай профессионал өөредилге системазынга мергежилдиг кадрлар белеткээр көңгүс чаа адыр моделин тургузарынче угланган, "Профессионалитет" төлевилел-биле өөредилгези сентябрь 1-де эгелээр, Россияның 68 регионунуң санында Тыва эрткен чылын киргенин сагындыраал. Төлевилел өөренип тургаш-ла, адырынга ажылдаарынга белен профессионал кадрларны өөредип алырынга сонуургалдыг ажыл берикчизи аңаа киржип, өөредилге-бүдүрүлге кластерин ажыдар.
Тываның Баштыңы Владислав Ховалыг ону республиканың ортумак профессионал өөредилге системазын сайзырадырынга шуут-ла чаа чада болур деп демдеглээн. "Бистиң экономикавысты хөгжүдериниң мурнады боттандырар угланыышкыны – мергежилдиг ажылчын кадрларны белээткээринде – деп, ол демдеглээн. – Көдээ ажыл-агый кластериниң эң херек болгаш перспективтиг угланыышкыннарынче, практиктиг өөредилгеже кичээнгейни күштелдирер бис".
Таңды кожууннуң Балгазын суурда Тываның агроүлетпүр техникуму республикага "Профессионалитет" программазын боттандырар баазалыг өөредилге организациязы болур. Федералдыг төлевилел-биле өөредилгени сес өөредилге программазынга чорудар, мал продукциязының технологу, малдан аъш-чем продукциязының технологу, көдээ ажыл-агый машиналарын ажыглаар болгаш септээр мастер, үнүш ажаакчызы, арга-арыг болгаш арга-арыг-парк ажыл-агыйының мастери дээн ышкаш мергежилдерге өөренип болур.
"Профессионалитет" төлевилел күүселдези-биле техникумда эде чаарттынган сес өөредилге бүдүрүлгелери ажылдап турар. Кат-чимис, ногаа, сүт болгаш эът продукциязы болбаазырадыр өөредилге-бүдүрүлге мастерскаяларынга, үнүш ажаар өөредилге-бүдүрүлге шөлдеринге өөредилге чорудар төптү ажылдадыр.
"Оолдар, уругларны ажыл-биле хандырарынга дузалажыр бис" – деп, Владислав Ховалыг дыңнаткаш, келир үеде ажыл берикчилери апаар регионнуң чедиишкинниг көдээ бүдүрүкчүлери боттарының ажыл-агыйының баазазынга билиглерин практиктиг ажыл-биле быжыглап, төлевилелди кады боттандырар партнерлар болурун тайылбырлаан.
Хүлээп алыышкын кампаниязы июньнуң 19-та ажылын эгелээш, август 20-де доозар. 9 база 11 класстың доозукчулары документилерин республиканың хүлээп алыышкын комиссиязынче боду азы Күрүне ачы-дузаларының порталы азы Россияның почтазы таварыштыр чагаа-биле дужаап болур.
Июньнуң 23-те Кызылда Арбат шөлүнге эртер Аныяктар хүнүн демдеглээн байырлал үезинде ажылчын олуттар ярмарказында дужаап болур.
Ярмарка үезинде "Профессионалитет" федералдыг төлевилелдиң төлээлери оолдар чаа өөредилге программазы-биле өөренириниң эки талаларын тайылбырлап таныштырар.
/ ТР-ниң Чазааның парлалга албаны.
"Шын" №44 2023 чылдың июнь 17