Тыва Республиканың найысылалы Кызыл хоорайны база чоок-кавы кожууннарны электри энергиязы-биле хандырып турар «Кызылская» деп 220 кВт подстанцияны чаартып, модернизастаар ажылдарны «Росчеткилер» эгелээн.
Күш дериг-херекселдерин бүрүнү-биле солуп чаартыр, а чемгерикчи төптүң күчү-күжү ийиден хөй катап – 330 МВА чедир улгадыр. Ынчан энергодефицит айыылы узуткаттынар болгаш регионну хөгжүдүп-сайзырадырынга таарымчалыг инфраструктура байдалдарын тургузар арга тыптып келир. Шак бо чугула төлевилелче киириштирген инвестициялар 5 млрд рубль ажыг дээрзин «Росчеткилер» дыңнаткан.
«Росчеткилер» ФЧК ЧЭС объектиге чаа автотрансформаторларны база Россияга бүдүрген трансформаторларны, реактивтиг күчү-күш хандырар немелде чаа херекселдерни тургузар. Ынчан подстанцияга чаа хереглекчилерни кожуп болур апаар болгаш четкилерде электри энергиязының күжүн турум болдурар, чидириглерин эвээжедир болгаш тыва энергосистеманың ажылының шынарын бедидер арга тургустунар.
«Кызылская» подстанциязы Тывада 110 болгаш 220 кВт комплектилиг элегазтыг хуваалда херекселдери-биле (КРУЭ) чүмнеттинген бир дугаар магистралдыг четки объектизи болу бээр. Ооң эки талалары – айыыл чок байдалдыы, хөй чер эжелевези, экологтуг шынарлары, бо бүгү сырый туттунуп турар байдалдарывыска чугула болуп турар. Дериг-херекселди муңгаш оран-саваларга тургусканы агаар-бойдус салдары-биле технологтуг хажыдыышкыннар айыылын эвээжедир арганы бээр.
Подстанция республиканың төп, мурнуу болгаш чөөн талада кожууннарын болгаш 113 муң кижи чурттакчылыг Кызыл хоорайны электри энергиязы-биле хандырып турар болгаш Кызылдың ЧЭТ-ке күчү-күш бээринге киржип турар. Оон аңгыда, шак бо энергия объектизи – Тываның энергодээрбээнче кирип турар «Шушенская опорная – Туран – Кызыл» деп 220 кВт электри дамчыдылгазының шугумунуң өзек кезээ болуп турар. Ол Красноярск край биле Хакас Республиканың генерация объектилеринден Тываже электри энергиязын дамчыдарын хандырып турар.
Бистиң корр.