Хөгжүм-аялганыӊ өнчүзү «Эне-Сайныӊ аялгалары» деп төлевилелди Президентиниӊ культура талазы-биле эгелекчи саналдар фондузунуӊ деткимчези боттандырган.
Красноярскыныӊ академиктиг симфония оркестри дээрге Россияда симфония хөгжүм-аялгаларны ойнап күүседир эӊ-не кол коллективтерниӊ бирээзи. Олар Енисей Сибирьниӊ хоорайларынга июнь 6-9 хүннеринде концерт көргүзер.
Гастрольдарны Ростислав Кенденбильдиӊ 100 харлаан, Хүреш-оол Дамбаныӊ 80 харлаан оюнга тураскаадып турар.
Тыва композиторларныӊ болгаш делегейниӊ ат-сураглыг классиктериниӊ чогааткан аялгаларын дирижер Михаил Мосенковтуӊ удуртулгазы-биле күүседир.
Июнь 6-да Тываныӊ В.Көк-оол аттыг Национал хөгжүм-шии театрынга концерт үндүрер. Ростислав Кенденбильдиӊ «Чечен биле Белекмаа» операзын, «Чавыдак», «Колхозчу», «Танцы-сам», «Сөс чок ырлар» деп аялгаларны, Хүреш-оол Дамбаныӊ «Мээӊ Тывам» симфониктиг поэмазын бараалгадыр. Пётр Худиногов флейтага чараш аялгаларны ойнап күүседир.
Тываныӊ В.М.Халилов аттыг күрүне филармониязыныӊ артистери Дамырак Моӊгуш, Тэгшээ Цэцэнэлгэр, Сайлык Хондурай, Шыӊгыраа Ондар, Эльвира Докулак бо концертке киржир.
Июнь 7-де «Хөөмей – Төп Азия чоннарыныӊ культуразыныӊ онзагай уран чүүлү» деп Делегейниӊ VIII-ки этно-хөгжүм симпозиумунуӊ ажыдыышкыны болур.
Делегейниӊ дыка хөй чурттарында билдингир «Алаш», «Чиргилчин», «Одучу», «Khoomei beat» бөлүктери Красноярскыныӊ симфониктиг оркестри-биле кады концерт көргүзер.
Тыва улустуӊ ыры-хөгжүм үран чүүлүн, хөөмей, сыгыт, каргырааны бараалгаткан соонда, шылгараӊгай тыва композитор Владимир Тока чогаадыкчы ажыл-ижиниӊ дээжизи — «Ыржым булуӊ» деп симфониязыныӊ 3-кү биле 4-кү кезээн симфониктиг оркестр бараалгадыр.
Бүгү делегейге билдингир композитор Николай Римский-Корсаковтуӊ «Шехерезада» симфониктиг сюитазын концерттиӊ ийиги кезээнде ойнап күүседир.
Июнь 8-те, Саяногорск хоорайныӊ «Энергетик» деп культура бажыӊынга Н. Римский-Корсаковтуӊ «Шехерезада» симфониктиг сюитазын болгаш тыва композиторлар Р.Кенденбиль биле Х.Дамбаныӊ чогааткан аялгаларын күүседип, концерт үндүрер.
Красноярк крайныӊ филармониязыныӊ медээзи-биле Р. Демчик белеткээн.
