Тываның Баштыңы Владислав Ховалыг республиканың кожууннарының чурттакчы чонун культура болгаш уран чүүлче хаара тударынче база чогаадыкчы коллективтерниң үнүүшкүннүг ажыл-чорудулгазын деткииринче угландыр 2024 чылда эгелээн “Культурлуг десант” төлевилелче «Тывалар бис» деп хөгжүм-шүлүктүг шиини киирерин Культура яамызынга дааскан.
Владислав Ховалыг Ада-чурт камгалакчызының хүнүнүң бүдүүзүнде ТР-ниң Национал театрынга болуп эрткен шииниң баштайгы көргүзүүн сонуургаан:
— Ада-чурт камгалакчызының хүнүнде мындыг белекти сөңнээн Эрзинниң «Сеңгилең» эстрада театрының уран чүүл база техниктиг бүгү бөлүүнге чедиишкинниг оюн көргүзүү дээш байырны чедирип, сеткилим ханызындан четтиргенимни илереттим – деп, ол чугаалаан.
Эрзин кожууннуң алдарлыг шүлүкчүзү, гвардияның сержантызы Вадим Чыкайның шүлүктеринге тургускан “Тывалар бис” деп хөгжүмнүг шүлүк шиизи – тускай шериг операциязының маадырларынга тураскааткан, амгы болуушкуннарга үндезилеттинген патриотчу драма болур.
Шииниң маадырлары — 55115-ки гвардейжи аңгы мото-адыгжы бригадада албан-хүлээлгезин эрттирип турар тыва дайынчылар. Дайынчыларның кадыг-берге хүннерин шииниң алды аңгы кезээнде көргүскен. Авторнуң хөгжүм-биле шүмээн күштүг одуруглары маадырларның аңгы-аңгы аажы-чаңын, көрүштерин база бодалдарын илередип турар. Каржы-дошкун шенелделер турза, оларның чуртталгага ынакшылын, чырык келир үеге идегелин база эр мөзү-бүдүжүн сып шыдаваан.
Шииниң автору Вадим Чыкай – амгы үеде ТШО киржикчизи болгаш, ында болуп турар шынныг болуушкуннарны дамчыдып көргүскен. Артистерниң рольдарынга бердинипкен оюн-көргүзүү Төрээн чурту, ооң чону дээш чоргааралды оттуруп, ниити чаагай чоруувус дээш кижи бүрүзүнүң харыысалгазын угаадып турар.
Эрзин кожууннуң салым-чаяанныг чурттакчылары, Эрзинниң эстрада театры «Сенгиленниң» бот-тывынгыр артистери шиини ойнаан.
Бистиң корр.
Чурукту ТР-ниң Чазааның сайтызындан алган.
“Шын” №7 2025 чылдың февраль 27
«Тывалар бис» — «Культурлуг десант» төлевилелче кирген
4 марта 2025
8