Октябрь 5-те Россияда Башкылар хүнүн демдеглеп эрттирип турар. Бистиң чуртувуста башкылар хүндүлүг дыштанылгаже эртежик үне бээр эргелиг.
2024 чылдың эгезинден тура Тывага 17 башкы ол эргезин ажыглаан. Россияның социал фондузунуң Тывада салбырының учедунда уруглар албан черлеринге ажылдап турган башкы стажы-биле эртежик хүндүлүг дыштанылгаже үнген 1855 башкы турар.
Хүндүлүг дыштанылгаже эртежик үнериниң кол негелделери:
- уруглар албан черлеринге чогуур эрге-дужаал болгаш ажылчын олутка ажылдаандан бээр 25 чылдан эвээш эвес үени ажылдаан болуру;
- пенсия коэффициентизин 2024 чылда 28,2-ни, 2025 чылда 30-ни ажылдап алган турар ужурлуг.
Хүндүлүг дыштанылгаже эртежик үнүп турар башкыларга пенсия тѳлевириниң эгелээр ай-хүнүн негеттинип турар тускай стажынга чедир 60 айдан эвээш эвес үеде тодарадып каан турар ужурлуг.
Тускай стажка чүгле РФ-тиң Чазааның 2002 чылдың октябрь 29-та бадылаан 781 дугаарлыг доктаалынга үндезилээн албан черлериниң болгаш албан-дужаалдарның даңзызынче кирип турар ажылдар хамааржыр. 2024 чылдан тура ол Даңзыже тьютор, күш-культура инструктору, директорнуң кижизидилге болгаш уругларның хѳй-ниити каттыжыышкыннары-биле кады ажылдажылганы чорудар чѳвүлекчизи деп албан-дужаалдарны немей киирген.
Тываның башкылары хүндүлүг дыштанылгаже үнер эргезин эрте ажыглап болур. Чүге дээрге Тыва Республика Кыдыкы Соңгу чүкке хамааржыр болгаш Кыдыкы Соңгу чүкке деңнеп каан черлер деп бѳлүктерге чарлыр. Ийи азы оон хѳй ажы-тѳлдүг херээжен башкылар «соңгу чүк» стажы 12 чыл база соңгу чүкке деңнеп каан черлерге 17 чыл ажыл стажтыг болза, база ол ышкаш 20 чыл камгалал стажтыг болза, 50 харлыында пенсияже үнер эргелиг. 60 харлыында пенсияже үнер эр башкылар 15 чыл Кыдыкы Соңгу чүк азы 20 чыл Кыдыкы Соңгу чүкке деңнеп каан черге болгаш 25 чыл камгалал стажтыг болур ужурлуг.
Пенсияга хамаарышкан эргелерин билип алыры-биле башкылар ажылдап турар черлериниң кадрлар килдизинге барып, ТР-де Россияның социал фондузунуң салбырынче документилерин кииртир. Кирген документилерни специалистер сайгаргаш, тайылбырны бээр, херек апарза, камгалал стажын, ооң иштинде чиигелделиг стажты, бадыткаарынга практиктиг дузаны кадар.
Эртежик пенсияже үнеринге хамаарышкан айтырыглар бар болза, регионнуң 8-800-200 0543 дугаарлыг контакт-тѳвүнче ажыл хүннеринде 9.00 шактан 18.00 шакка чедир долгап болур. Пенсия болгаш социал камгаладылгага хамаарышкан сѳѳлгү медээлерден чыда калбас дизе, социал четкилерде Россияның социал фондузунуң ТР-де салбырының арыннарынче бижикчи болуп кирип алырын сүмелеп турар.
/ Россияның социал фондузунуң Тывада салбырының медээзинден.
Чуруктиу интернет четкизинден алган
“Шын” №77 2024 чылдың октябрь 9