Тываның аэропорту 2024 чылда 120 муң пассажирни аргыштырган. 2023 чылга деңнээрге, 10 хуу хөй болган. ТР-ниң Орук-транспорт яамызы эрткен чылдың ажылының түңнелдери-биле үлешкен.
Республикада агаар транспорту-биле аргыжып турар пассажирлер санының көвүдээниниң дугайында Тываның Баштыңы Владислав Ховалыг бодунуң блогунга: “Чиигелделиг рейстерниң көвүдээни-биле Кызылдың аэропортун таварыштыр авиа-аргыжылганың бүдүрүкчүлүү улгаткан. Ооң мурнунда чылын Новосибирскиже самолёт неделяда 3 катап ужар турган болза, 2024 чылда ынаар углай самолёттар хүн бүрүде ужуп, чугула хереглелдиг апарган” – деп, ол бижээн.
Тыва агаар таварыштыр пассажирлер аргыштырылгазын көвүдедирин уламчылап турар. Иркутск, Красноярск, Улан-Удэ уунче ужудуушкуннар четкизи калбарган. 2024 чылда Кызылдың аэропортундан Моолче делегей чергелиг рейс бир дугаар ушкан. Тывада эң-не хереглелдиг болгаш чоннуң манаары дорт рейс – Кызыл – Москва аразында. Ол үргүлчү 100 хуу долу болур.
Амгы үеде бар өртек-биле 2025 чылда Тывадан болгаш дедир база авиа-аргыштырылганың хемчээлин улгаттырар курлавыр бар. Регионнар аразынга ужудуушкуннарны база делегей чергелиг рейстер дег сайзырадыр сорулга салдынып турар.