Регионнуң Аныяктар херектериниң талазы-биле яамызы эрткен чылда ажылының түңнелдерин ведомствонуң коллегия хуралынга чугаалашкан. Аңаа аныяктарның хөй-ниити организацияларының удуртукчулары база аныяктар каттыжыышкыннарының идепкейжилери киришкен.
Яамы 2025 чылда «Тыва Республиканың күрүнениң аныяктар политиказының системазын хөгжүдери» күрүне программазын боттандырып, төлевилелдерни деткиир болгаш хөй-ниити амыдыралынче аныяктарны хаара тудар талазы-биле планнаттынган көргүзүглерин ажыр күүсеткенин илеткээн.
Аныяктарның эгелээшкиннерин акша-хөреңги талазы-биле деткиири кол угланыышкыннарның бирээзи болган. Яамы республиканың аныяктарының 15 төлевилелин деткиир планныг тургаш, херек кырында 25 социал болгаш бизнес эгелээшкиннерни деткээн. Грант деткимчезинче ниитизи-биле 2,5 млн рубльди аңгылаан. Социал угланыышкынныг төлевилелдерге тиилекчилер аразындан Чаян Хертектиң «Ойнаалам че. Оюнчукпай!» ширээ оюннарының мастерскаязы» деп төлевилели 150 муң рубльдиң грант деткимчезин алган. «Аныяктарның бизнес төлевилели» деп бөлүкке Даяна Тажының «Смыслы» улуг улус лагери» 145 муң рубль хемчээлдиг грантыга төлептиг болган. Ол ышкаш тыва аныяктар Аныяктар херектериниң талазы-биле федералдыг агентилелдиң «Росмолодежь.Гранты» грант деткимчезиниң мөөрейинге киришкеш, 2 миллион ажыг рубль акшаны ойнап алган.
Яамының база бир кол угланыышкыннарының бирээзи – аныяктарны эки турачы ажылдарже хаара тудары. 2025 чылда Тываның эки турачылар шимчээшкини эң идепкейин көргүскен: республиканың 7 хардан өрү назылыг 29 муң ажыг чурттакчылары волонтер ажылынга киришкен. Аныяктар херектериниң яамызы-биле кады ажылдажылгалыг аныяктарның хөй-ниити организациялары бо ажылга улуг үлүг-хуузун киирген. Оларның ажыл-чорудулгазы амыдыралдың шупту кол угланыышкыннарын хаара туткан: патриотчу кижизидилгеде: «Тиилелгениң волонтерлары» база «Юнармия»; хууда сайзырал болгаш профессионал угланыышкында: «Баштайгыларның шимчээшкини» (РДДМ), «Россияның студент отрядтары»; хамааты контрольда: «Улусчу фронтунуң аныяктары» база Кызыл мэриязының аныяктар командазы; социал ачы-дузада: «Волонтер эмчилер», «Тываның буянныг чүректери», «Сүбедей» шимчээшкини; эрге-хоойлу өөредилгезинде: Чаңгыс демниг Россияның аныяк гвардиязы, Тываның Бүгү-эвилелдиг ленинчи комсомол эвилели, Тыва Республиканың Аныяктар Хуралы (парламентизи) дээш оон-даа өске.
«Добро.РФ» чаңгыс аай информация системазының дыңнатканы-биле алырга, республикада 364, ооң иштинде 120 коммерцияга хамаарышпас организациялар, 106 школалар, 12 ортумак профессионал өөредилге албан черлеринде эки турачы организациялар бүрүткеттинген. Тываның волонтерлары РФ-тиң Президентизиниң, Тываның Баштыңының, Дээди Хуралдың (парламентиниң), Аныяктар херектериниң талазы-биле яамының өөрүп четтириишкин бижиктерин болгаш өске-даа ведомство шаңналдарын алганнар.
Яамы түңнелдерни үндүрүп тура, 2026 чылдың мурнады көөр угланыышкыннарын тодараткан болгаш кол төлевилелдерни чарлаан. Кожууннар аныяктарынга материалдыг баазаны тургузары болгаш чаартыры база улуг хемчээлдиг төлевилелдерни боттандырары – кол угланыышкын. Чижээ, ийи кожуунда – Мөңгүн-Тайга кожууннуң Мугур-Аксы суурда «Мөңгүн» база Каа-Хем кожууннуң Сарыг-Сеп суурда «Дамырак» аныяктар төвүнге капитал септелге ажылдары планнаттынган. Республиканың аныяктар политиказының экосистемазынга хыналданы планнаан. Бо ажыл аныяктар политиказының шупту кезектеринде амгы байдалды сайгарарынче, оларның дээштиин үнелээри, оон-даа ыңай хөгжүдеринге арга-сүмелерни ажылдап кылырынче угланган. Хыналда регионнуң аныяктар политиказының курлавырларын экижидеринге болгаш элээн тода стратегияны тургузарынга дузалаар.
Бо чылдың августа болуп эртер IV делегей чергелиг буддийжи шуулганга волонтерлар штавының ажылын организастаары – чылдың кол болуушкуну апаар. 200 ажыг кижи штабче кирер күзелин илереткенин ведомство дыңнаткан.
ТР-ниң Чазааның парлалга албаны.