Арзылаң мөге Маадыр Монгуш-биле байырлажыр ёзулал март 9-та Кызыл хоорайның "Сүбедей" спорт ордузунга 10.00 - 12.30 шакта болур. Ат-алдарлыг улуг мөге-биле байырлажыр күзелдиг чонга Тыва Республиканың Спорт яамызы дыңнадып тур.
Март 7-де, 54 харлыында, Арзылаң мөге Маадыр Кавааевич Монгуштуң чүрээ хенертен сокпайн барган.
Маадыр Кавааевич — ёзулуг тыва эр кижиниң овур-хевирин, бүдүжүн илереткен мөге. Ооң күчү-күжү, мерген угааны, дузааргак биче сеткили тыва чонга, аныяк болгаш үе-черге мөгелерге дириг үлегер-чижек болуп чораан. Ол Тыва Республиканың алдарлыг ажылдакчызы, Тыва Республиканың Арзылаң мөгези, Россияның күш-культуразының тергиини, ССРЭ-ниң болгаш Россияның хостуг хүрешке спорт мастери, Моолдуң Баян-Өлгий аймактың Арзылаң мөгези бедик аттарның база биче-буурай чоннарның аразында Европа чемпионадының хүлер медалының дээш оон-даа өске орден-медальдарның эдилекчизи.
