Бөгүн, май 25-те, Кызылдың Калинин кудумчузунда 24 “Б” дугаарлыг бажыңга Тываның баштайгы профессионал кинооператору, Тыва АССР-ниң культуразының алдарлыг ажылдакчызы, “Шылгараңгай күш-ажыл дээш” орденниң эдилекчизи чораан Карма Домбуевич Монгуштуң (25.05.1936-24.06.2012ч) чырык адын мөңгежиткен мемориалдыг самбыраның байырлыг ажыдыышкыны болган.
Аңаа алдарлыг кинооператорнуң ажы-төлү, төрел чону, тыва журналистиканың хоочуннары болгаш өскелер-даа киришкен.
Хемчегни Тываның Журналистер эвилелиниң даргазы Эльвира Лифанова ажыткаш, республиканың журналистериниң “Чонар-даштан бийир” профессионал мөөрейинге келир чылдан эгелеп “Карма Монгуштуң шаңналы” деп номинацияны операторлар аразынга чарлаары чугулазын дыңнаткан.
К.Д. Монгуш физик-математик мергежилди чедип алган соонда, 1967-1971 чылдарда Бүгү-россияның күрүнениң кинематография институдун дооскаш, “Тыва” КТРК-га 40 чыл операторлап ажылдаан.1993 чылдан тура Россияның Журналистер эвилелиниң кежигүнү, дээди категорияның оператору, хөй шаңнал-макталдың эдилекчизи. Ол ажылдап чораан үезинде эвээш эвес операторларны өөреткен. Ооң өөреникчилери сөөлүнде барып, телевидениениң шылгараңгай операторлары болгулаан. Оларның бирээзи, барымдаалыг фильмнер тырттырар хөйге билдингир кинооператор Шамиль Седен-оол.
Карма Монгуш-биле хөй чылдарда кады ажылдап чораан коллегалары, бо хүнде тыва журналистиканың хүндүлүг хоочуннары, тыва телевидениениң эң баштайгы дикторларының бирээзи, ССРЭ-ниң Телевидение болгаш радионуң тергиини Дыдый Сотпа, Тываның алдарыг журнализи Роман Тас-оол, режиссер Светлана Саган-оол сөс ап, чылыг сактыышкыннарны кылганнар.
Алдарлыг кинооператорнуң оглу Омар Монгуш ачазының шыдыраага, альпинизмге хандыкшылдыг чораанын сактып чугаалааш, чыылганнарга четтиргенин илереткен.
Ол көңгүс аңгы мергежилдиг болуп, ачазы ышкаш кинооператор болбаан-даа болза, хостуг үезинде кыска роликтерни тырттырып чоруурун база дыңнаткан.
К.К.Монгуш
#Шынсолун #ТываныңЖурналистерэвилели #КармаМонгуш #ПервыйкинооператорТувы
#СоюзжурналистовТувы #ВетераныСЖТ #ВетераныГТРКТыва
