Тыва Республиканың Баштыңы Владислав Ховалыгның Донецк Улус Республикада ажыл-агыйжы албан-херек аайы-биле чедип келгенин ДУР-нуң Чазааның даргазы Виталий Хоценко российжи массалыг информация чепсектеринге дамчыткан. Владислав Ховалыгны Донбасска Виталий Хоценко боду үдеп чоруп турган.
Владислав Ховалыг биле Виталий Хоценко Донецк Улус Республиканың шериг госпитальдарының бирээзинде Тывадан ажылдап чеде берген эмчилерге барып ужурашканнар. Олар дээрге Чөөн-Хемчик кожууннуң төп эмнелгезиниң анестезиолог-реаниматологу Артыш Сат биле эмчи сестразы Алдынай Монгуш, туберкулезка удур диспансерниң анестезиолог эмчизи Чимис Балдан, республиканың № 1 эмнелгезиниң кол эмчизиниң оралакчызы, хирург Айдың Серен-оол, хирург-эндоскопист Арсений Ондар, травматолог-ортопед Эргил Чадамба.
Украинада чоруп турар тускай дайынчы операцияның үезинде ДУР-га чедип келгеш, дайынчы хөделиишкиннерге балыглаткан российжи шериглерге бедик шынарлыг эмчи дузазын чедирип, оларны эмнеп турары, сагыш човангыр болгаш эрес-дидим чоруу дээш Виталий Хоценко Тывадан эмчилерге Донбасстың чонунуң мурнундан өөрүп четтиргенин илереткен.
Тываның Баштыңы Владислав Ховалыг эмчилерниң ажылдап-чурттап турар байдалы-биле таныжып, тускай дайынчы операция үезинде балыглаткан шериглерге болгаш чурттакчы чонга эмчи дузазын чедирип, боттарының эмчи даңгыраан, албан-хүлээлгезин оларның бедик деңнелге күүседип турарын демдеглээн.
Владислав Ховалыг биле Виталий Хоценко Тыва Республика биле Донецк Улус Республиканың аразында социал-экономиктиг, культурлуг болгаш спортчу харылзаалар хөй янзы болурун демдеглеп, тускай дайынчы операция үезинде кол-ла чүүл – гуманитарлыг кады демнежилгени уламчылаары деп айытканнар.
«Бистиң республикаларның аразынга Дугуржулганы ажылдап кылырын сүмелештивис – деп, Владислав Ховалыг бодунуң блогунга бижээн. – Кады кылыр ажылдар хөй. Бо хүнде чугула дээн ажыл – ачы-дуза чедирилгезин ам-даа уламчылаар бис».
Украинада тускай дайынчы операцияда киржип турар шериг албан-хүлээлгелиг чаңгыс чер чурттугларывыска болгаш оларның өг-бүлелеринге дузаның Республика штавының чыгганы идик-хеп, аъш-чем дээш дайынчыларның чугула хереглелиниң өске-даа чүүлдерин чүдүрген автомашинаның Луганск Улус Республикада онча-менди чеде бергениниң дугайында медээни алганын Владислав Ховалыг бодунуң блогунда медеглээн.
Бистиң чаңгыс чер чурттугларывыс дайынчы оолдарның ада-иелериниң, чоннуң чыгганы дузаны бодунуң хууда чүък машиназынга Луганскыга чедир сөөртүп чедиргени дээш республиканың Дээди Хуралының депутады Эрес Хууракка өөрүп четтиргенин Тываның Баштыңы илереткен. Тускай дайынчы операцияда киржип турар оолдарынга ужуражып чеде берген иелерге ак орукту Владислав Ховалыг күзээн.
Донецк Улус Республиканың Чазаа-биле ажыл соонда Росгвардияның Тыва Республика талазы-биле эргелелиниң Донбасста шериг албан-хүлээлгезин эрттирип турар ажылдакчылары-биле ужурашканын Владислав Ховалыг бодунуң блогунда бижээн. Тускай дайынчы операция чоруп турар зонада оларның дайынчы даалгазын төлептии-биле күүседип турарын республиканың удуртукчузу дыңнаткаш, нарын болгаш айыылдыг байдалдарга бот-боттарынга дузалажып, камнанып чоруурун чагып чугаалаанын Владислав Ховалыг блогунга дүүн, декабрь 6-да, бижээн.
Шаңгыр-оол МОНГУШ белеткээн.
