Тываның Баштыңы Владислав Ховалыг ажыл-албан аайы-биле Москвага чорааш, Россияның орук-транспорт сайыдының бирги оралакчызы Андрей Костюк-биле регионда хемнерниң дажаанындан когараан орук инфраструктуразын катап тургузар айтырыгны ажылчын байдалда чугаалашкан. Ужуражылганың түңнелинде чогуур хемчеглер даңзызын тургузар федералдыг ажылчын бөлүктү хевирлээр шиитпир хүлээп алдынган. «Ак-Довурак – Абакан» автоорукда көвүрүгнү катап кылыр айтырыгны бир дугаарында шиитпирлээр.
Өрттер болгаш үерлээшкин талазы-биле байдал губернаторнуң контролюнда. Владислав Ховалыг оперативтиг албаннар, яамылар удуртукчулары болгаш муниципалдыг тургузуглар баштыңнары-биле доктаамал харылзаада турар. Чурттакчылыг черлерде бойдустуң хлавындан когараан өг-бүле бүрүзүнүң айтырыын боттары хыналдага алырын кожуун баштыңнарындан негээн. Тус чер чагыргалары малчын турлагларже, тускай шериг опреациязында шериг хүлээлгезин күүседип чоруткан эр кижилерлиг өг-бүлелерже онза кичээнгейни салыр.
Хемчик хемниң дажаанындан, Сүт-Хөл кожууннуң Суг-Аксы суурда бажың чанының сес участогу сугга алысканын оперативтиг албан черлери дыңнаткан. Суурда түр үениң пунктузун ажыткан, чурттакчыларны айыыл чок черже көжүрүп, херек чүүлдер-биле хандырган. «Суг-Аксы – Чадаана» оруунда кезек черни суг алган. Сүт-Хөлдүң Кара-Чыраа биле Кызыл-Тайга суурларның чурттакчыларының шимчээшкиннери база-ла ындыг. Суг-Аксы биле Ишкин суурларның аразында аргыжылга чок.
Бай-Тайга кожуунда суггур чаъстар Алаш, Тапсы база Хемчик хемнерниң суун хенертен көдүрген. «Тээли – Кызыл-Даг» аразында кежигни дажаан суг чууй шаапкан. Бай-Тайганың ийи суурунче – Кара-Хөлче база Кызыл-Дагже аргыжылга чок.
Июньнуң 13-те Кара-Хөл сумузунче 900 кил аъм-чем аймаан агаар транспорту-биле чедирген. Суурнуң чурттакчылары - 9 биле 11 класстың доозукчуларын, бир башкыны база улгады берген бир кижини дедир ужарда ап алгаш, кожуун төвүнде чедирген.
Үрелген орук участоктарын дүрген септеп, катап тургузарынга херек техника болгаш специалистер санын ам-даа көвүдедир даалганы Орук-транспорт яамызынга берген.