Россияның чаа девискээрлеринче ажылчын сургакчылаашкынның үезинде Тываның Баштыңы Владислав Ховалыг Төп болгаш Чөөн шериг округтарынга чедип, ында албан-хүлээлгезин эрттирип турар бистиң чаңгыс чер чурттугларывыска ужурашкан.
Республиканың бирги удуртукчузу-биле кады тускай шериг операциязының айтырыгларының талазы-биле тускай төлээзи Тимур Куулар, ТР-ниң Дээди Хуралының Даргазы Каң-оол Даваа, а ол ышкаш депутат Эрес Хуурак олар чорааннар. Шериг албанныгларның чагыын ёзугаар садып алганы техиктиг дериг-херекселди делегация чедирип чораан.
Дайынчы сорулгаларны ак сеткилдиг күүседип турар чаңгыс чер чурттугларының төрээн арыннарын көөрү өөрүнчүг болган дээрзин Владислав Ховалыг бодунуң блогунга демдеглээн. Дайынчылар төрээн Тывазынга изиг байырны чедиргеннер.
Делегацияның чедирип бергени тускай техниканың санында квадрокоптерлер, дроннарны өжүр шавар херекселдер, харылзаа чепсээ болгаш өске-даа дериглер бар.
Немелде техниктиг херекселдер-биле дайынчыларны дериирин Тываның төлээлери доктаамал чорудуп турар. Бистиң оолдарның шериг албан-хүлээлге эрттирип турары салбырлардан чагыгларны баш бурунгаар чыып турар. Ук дуза республикадан барган дайынчы бүрүзүнге четсин дээш, аңгы-аңгы шериг кезектерин хаара тударын кызыдып турар.
Техниктиг дериг-херекселдерниң дамчыдылгазындан аңгыда, регионнуң төлээлери дайынчыларны дүвүредип турар айтырыгларга хамаарыштыр чугаалашканнар. Нургулайында шериглер эмчи дузазының, өг-бүлениң байдалының аайы-биле шөлээлерни тыпсырынга, бот-өөредилге талазы-биле айтырыгларны салган дээрзин Владислав Ховалыг демдеглээн. 41-ги армияның удуртулгазының база 55-ки бригаданың командири полковник Сергей Карасёвтуң киржилгези-биле киирген өргүүделдерниң хөй кезиин ол-ла черинге шиитпирлээн дээрзин Тываның Баштыңы дыңнаткан.
А. ХЕРТЕК белеткээн
“Шын” №83 2023 чылдың ноябрь 1
