«Чуртта болуп турар дүвүренчиг болуушкуннарга хамаарышкан эң-не баштайгы медээлер үнүп кээрге, эң-не эгезинде-ле, Президентини деткип, чаңгыс демниг болур деп бодап алган бис. РФ-тиң Президентизи Владимир Путинниң дорт эфирге ук байдалга хамаарыштыр чонга кыйгырыы – шын туруш ээлээнивистиң бадыткалы болду» - деп, ТР-ниң Баштыңы В.Ховалыг социал четкиде бодунуң каналынга демдеглээн.
Ооң чугаазы-биле алырга, демниг болбайн, ийи чарлы бээри – эң-не коргунчуг кем-херек үүлгедиишкини болуп турар. Тускай мергежилдиг шериглер, эки-турачылар, хууда шериг компанияларының дайынчылары болгаш долу эвес мобилизация-биле чоруткан хамаатылар ТШО-да киржип турар. Оларның аразында аңгы-аңгы омак-сөөктүглер база бар. Олар шупту төрээн чурттун камгалаар дээш, демнии-биле тура халчып келген.
«НАТО чурттарының талазындан кончуг улуг кызагдаашкынны биле тура-ла, тайбың чурттакчыларның амы-тынын бодавайн, шериглерни канчап бот-боттарынга удур кылдыр күткүүрүл? Россияның генералдарынга, маадырларынга удур канчап тура халыышкын кылырыл? РФ-тиң Президентизи, Дээди кол командылакчы Владимир Путинни, Камгалал яамызының удуртулгазын бүрүнү-биле деткиир бис. Олар бистиң тайбың амыдыралывыс, айыыл чок, хостуг чоруувус дээш дайзыннар-биле тулчуп турар» – деп, регионнуң Баштыңы түңнээн.