Бөгүн, август 27-де, бодунуң мергежилиниң байырлалын дагжыларның салгалы демдеглеп эрттирип турар. Бо болуушкун-биле холбаштыр Тыва Республиканың Баштыңы Владислав Ховалыг оларның адынга байыр чедириишкинин чоруткан:
«Бистиң дагжыларывыска Уургайжының хүнү-биле байыр чедирдим. Тываның болгаш Россияның хөгжүлдези дээш силерниң киирген ачы-хавыяаңар үнелеп четтинмес. Бөгүн республикада ийи компания хөмүр-даш тывыжын чорудуп турар. Сөөлгү үеде ооң тывыжынга көскү чедиишкиннерни чедип алган бис. Эрткен чылдың түңнелдери-биле алырга, 1,5 сая тонна хөмүр-дашты казып, тыпкан болуп турар. А кандыг-ла беш-он чыл бурунгаар 500–600 муң тонна тывышты эки көргүзүг деп санап турган болгай бис. Силерниң бедик мергежилдииңерниң база ажыл-ишке бердингениңерниң ачызында бистиң чуртка хөмүр-даш үлетпүрү моон-даа соңгаар хөгжүүр дээрзинге бүзүрээр мен. Каш чыл эртсе, демги ол 1,5 сая тоннаны чедип алдынган чедиишкиннерниң ээлчээнде азарганчыг көргүзүг кылдыр сагындырар апаар.
Бистиң шефке алган ЛУР-нуң Свердловск районунуң ат-сураглыг, чаагай чаңчылдарлыг уургайжыларынга база бо хүн-биле байыр чедирдим".
