Тываның Баштыңы Владислав Ховалыг Чаа чыл бүдүүзүнде бот-идепкейи база салым-чолу-биле кижилерниң сагыш-сеткилин доюлдуруптар чаңгыс чер чурттуглары-биле ужурашкан.
Оларның бирээзи – тускай шериг операциязының маадыры Сай-Даш Кавааның өөнүң ишти Евгения Каваа. Хөй ажы-төлдүг ие Тываның Баштыңы-биле ужуражылгага оодары-биле келген.
«Бо интернационал өг-бүлениң дугайында база чуртунуң камгалакчызы маадырның дугайында сактыышкынныг документалдыг фильмни бо хүннерде үндүрдүвүс. Чеди ажы-төлүнге ачазының алдар, эрес-дидим чоруу база Төрээн чуртунга бараан болур үлегери кезээ мөңгеде артар. Улуг оолдары спортка хандыкшылдыг болганынга, а бичии оглу удавас Кремль ёлказынче киржип чоруурунга өөрүп тур мен. Мындыг ужуражылгалар меңээ чоргааралды оттурар база бистиң ниити харыысалгавыс дугайында сагындырыг болур – маадырларывыс дугайында сактыышкынны кадагалап дамчыдары-дыр» деп, Владислав Ховалыг ужуражылга соонда бодунуң блогунга бижээн.
Ол ышкаш хүлээп алыышкын үезинде аныяк эртемден Артыш Монгуштуң «Эр сорук» деп төлевилелин деткээнин регионнуң удуртукчузу демдеглээн:
«Ол ном өзүп олурар салгалдарны чаңчылчаан үнелиг чүүлдерге даянып кижизидериниң дугайында, ооң иштинде эрес-дидим чоруктуң чижээ болур амгы үениң маадырларын — ТШО киржикчилерин үлегерге алган. Оларның быжыг туружу болгаш дидим чоруу — чүс-чүс чылдар дургузунда уламчылап чоруур тыва чоннуң тура-соруу-дур».
Бистиң корр.
Чурукту ТР-ниң парлалга албанындан алган.
“Шын” №48 2025 чылдың декабрь 11
