Владислав Ховалыг: “Бо чылдан эгелеп республика “Туризм болгаш аалчылар хүлээп алыышкыныңың индустриязы” национал төлевилелде киржип эгелээн. Тываже аян-чорукчуларның кээп турары көвүдээн деп федералдыг чадада демдеглеп турар. Шак ындыг деңнел чедеринге дыштаныр хүннүң турлары база дузалаан. Амгы үеде туризм талазы-биле адырның инфраструктуразын сайзырадыр ажылды уламчылап турар бис”.
Амгы үеде республикада туризм адырында 69 сайгарлыкчы чоруктуң субъектизи бүрүткеттинген. Оларның иштинде хууда сайгарлыкчылар - 35, албан чери - 34.
Эрткен чылын республикага 138 муң аян-чорукчулар кээп чораан. Ооң мурнунда чылга деңнээрге, 14 хуу хөй болуп турар. Төлевирлиг туристчи ачы-дуза чедирилгезиниң хемчээли 65 хуу өскен азы 267, 1 сая рубль четкен. Туристерден кирген үндүрүг төлевири 6, 5 хууга өскен. Шак ындыг түңнелдерни чедип алырынга Дус-Хөл, Чагытай болгаш Билелиг хөлдерде болгаш “Тайга” станциязында туристерге таарымчлыг байдалдарны тургусканы чылдагаан болган.
Тускайлаң программа шугуму-биле туризм адырын сайзырадырынче көрдүнген туристчи төлевилелдер шыңгыы деткимчени (763,81 сая рубль) алган. Ол акша-түң-биле туризм адырынга холбашкан 9 төлевилелди боттандырып турар. Үстүнде айыткан хөлдер чанында дыштанылга базаларындан аңгыда, Каа-Хем кожуунда, Тожуда турбазалар, Кызыл кожуунда “Ак” мотель, “Бойдус” дыштанылга базазы, Тес-Хемде “Дүктүг-Дыт” өг хоорайжыгаш, Бии-Хемде “Даг-Баары” туристчи төп хамааржыр.
#Тываныңчазааныңотчеду #Владиславховалыг #Туризмнисайзырадыр #Шынсолун #Тывадыл
