Регионалдыг Чуртталга-коммунал ажыл-агый яамызы шөлээлээр мурнунда курлавыр хандырылга организацияларынга өрелерин төлеп алырын республиканың чурттакчыларынга сагындырган.
Коммуникацияларны хандырар болгаш септээр, хамаатыларның чагыгларын күүседир, хөй квартиралыг бажыңнарны хандырар, планныг ажылдарны хевирлээр, өске тускайжыттынган организацияларны хаара тудар ажыл-чорудулгалар үе шаанда төлээн төлевирлерден дорт хамааржыр деп демдеглээн. Ниитизи-биле алырга, чурттакчылыг черлерниң ажыл-агыйжы турум ажылы оон хамааржыр.
Ылаңгыя күскү-кышкы үеге белеткениринге акшаландырыышкынның чедишпези, бүдүрүлгелерни элээн бергедедир. Ол ышкаш, шөлээлээр мурнунда төлеттинмээн коммунал ачы-дузалар чанып келирге эпчок чүүлдерге – хөөлер санаарынга база суд таварыштыр өрени тырттар дугайында дыңнадыгны эккеп болур.
Чылдың эгезинден бээр коммунал албаннар республиканың судтарынче ниитизи-биле 29,6 млн рубль түңнүг өрелиг кижилерже 1200 негелде билдириишкиннерни киирген. 18,5 млн рубль өрени тырткан.
Тываның чурттакчыларының ЧКА бүдүрүлгелеринге бөгүнде өрези 163 хире млн рубль четкен. Ооң 102 млн – соок суг хандырылгазы, 15 хире млн – чылыг болгаш изиг суг дээш, 26 млн ажыы – бокту үндүр сөөрткени дээш.
Чуртталга-коммунал ажыл-агый яамызының специалистери коммунал төлевирлерни үе шаанда төлеп алыр кылдыр хереглекчилерге ажыктыг элээн каш арга-сүмелерни ажылдап кылган. Өрелер чыглы бербес кылдыр, телефонунда азы планшединде календарьга сагындырып турар почта дыңнадыын тургустуруп алыр. База бир дээштиг арга - дыка хөй банкыларның боттарының капсырылгаларында саналдап турары автотөлевирлер. Ону салдырып алырга, чуртталга-коммунал ажыл-агый чарыгдалдарын, чырыкты, телефонда интернетти ажыглаанын боду-ла ала чайгаар төлеп турар болур. База бир арга – акша-хөреңгизи бар болза, ийи-үш ай бурунгаар коммунал ачы-дузаларны төлеп алыры.
Оон аңгыда, ЧКА яамызы коммунал курлавырлар учеттаар дериг-херекселдерниң ажыктыын сагындырган: сугну шын ажыглаанының төлевири доктааткан нормадан элээн эвээш болурундан, камналгалыг.
Коммунал ведомствонуң шөлээлеп чоруур деп турар кижилерге база өске ажыктыг сүмелери бар. Бир эвес техниктиг чылдагааннар уржуундан квартирада учет дериг-херексели чок болза, а бажың ээлери үр үеде турбаан болза, газ, изиг база соок суг хандырылгазы, суг төккени, чырык дээш эде санаашкынны кылдырып ап болур. Ону кылырда бажың ээлериниң ыңай-бээр чораан хүннерин санаваска, 5 хонук дургузунда чок турганын бадыткаан актыны тургузар. Бажыңынга турбаанын билеттер, гостиница азы ниитиниң чуртталга бажыңы дээш төлевириниң, Россиядан үнүп-кирип турганын демдеглээн даштыкы паспорту, азы өске документилер-биле шынзыдар.
Эде санаашкынны алырда, айыттынган доукментилерни кошкан билдириишкинни башкарыкчы компанияже киирер.
#Тываныңчуртталга_коммуналажыл_агыйяамызы #Тывареспублика #Шынсолун #Медээлер