Санкт-Петербург хоорайда чурттар аразының экономиктиг форумунга Тываның Баштыңы Владислав Ховалыг Россия – Моол – Кыдат деп чурттар аразының Тываның девискээрин дамчып эртер транспорт коридорун тургузар эгелекчи саналды киирген.
“Ук төлевилелче улуг өскерилгени кииргенивисти чугулалап айтыксап тур мен – деп Владислав Ховалыг медеглээн. – Ооң мурнунда Кызыл – Курагино аразынга пассажирлерге ажыы чок, чүгле чүък сөөртүр демир-орукту кылыры планнаттынып турган болза, ам Соңгу далай оруу биле Россияның мурнуу-чөөн кызыгаарын тудуштуруп турар транспорт коридорунче Тываны киирерин саналдап турар бис”.
Сөөлгү үеде делегейде болуушкуннарның салдары-биле Россияның Чөөн чүк чурттары-биле чоокшулажып турарын барымдаалаар болза, шак ындыг коридорну тудары чогумчалыг деп Тываның Баштыңы санап турар. Ук төлевилелдиң чугула херек болуп турарынга база ооң ачызында ажыттынып турар арга-хоргаларны форумнуң киржикчилери чөптүг деп көргеннер. РФ-тиң Президентизиниң Сибирь федералдыг округда бүрүн эргелиг төлээзи Анатолий Серышев, ук төлевилелдиң чүгле экономиктиг эвес, а политиктиг улуг ужур-уткалыг болуп турарын демдеглээн.
“Президентиниң дузалакчызы Игорь Левитинге, Президентиниң Сибирь федералдыг округда бүрүн эргелиг төлээзи Анатолий Серышевке, Россияның транспорт сайыдының оралакчызы Валентин Ивановка, МАСС-тың күүскомунуң даргазы Геннадий Гуссельниковка база бистиң презентациявыска келген бүгү губернатор эш-өөрүмге киирип турар саналывысты шын сеткилинден сонуургап, деткээни дээш өөрүп четтирип тур мен” – деп, Чазак Даргазы бодунуң социал четкилерде арыннарынга бижээн.