Республиканың Баштыңы Владислав Ховалыг Эрзин суурда күш-культура-спортчу төвү «Эльбрусметалл-Литий» КХН-ниң деткимчези-биле ажыттынганын дыңнаткан. Эрзин кожууннуң девискээринде Тастыг чыдынында руда казып-тывар төлевилелди боттандырып турар регионнуң улуг инвесторларының бирээзи «Эльбрусметалл-Литий» КХН-ниң деткимчези-биле спортчу объектини туткан.
Владислав Ховалыг спорт залының ажыттынганын чарлап тура, чурттакчы чоннуң амыдыралының шынарын экижидеринче база девискээрлерни хөгжүдеринче угланган социал төлевилелдерни боттандырарынга бизнестиң идепкейлиг киржилгези кол черни ээлээнин демдеглээн.
«Бир чыл бурунгаар куруг турган бо черде бөгүн кайгамчык спортчу комплекс туттунган. Чаа спорт залынга улуг чемпионаттарны болгаш маргылдааларны эрттирип болур, а эң кол чүүл - бүдүн чыл дургузунда маңаа доктаамал белеткенип болур апарган. 850 дөрбелчин метр шөлдүг спорт залы мини-футбол, волейбол болгаш баскетбол ойнаарынга таарыштыр дериттинген, ол ышкаш солуттунарынга болгаш тренерлерге тускайлаан өрээлдерлиг» - деп, регион удуртукчузу бодунуң блогунда спорт залын допчулай таныштырган.
Чаа спорт залының ажыдыышкыны суурнуң чурттакчыларынга, ылаңгыя тус черниң спорт школазының өөреникчилеринге, ёзулуг байырлал болган. Владислав Ховалыгның демдеглээни дег, ындыг спорт залының чогу кожуунда спорттуң долу хөгжүлдезин саададып турган.
Тываның Баштыңы «Эльбрусметалл-Литий» КХН ооң мурнунда база-ла Эрзин кожууннуң Качык суурда школа септелгезинге дузалажып турганын сагындырган.
«Эльбрусметалл-Литий» компания бичежек хүреш залдары тудар «Эзирлер уязы» деп төлевилелди база деткип турарын демдеглезе чогуур. Бо чылын инвесторнуң деткимчези-биле Бай-Даг (Эрзин кожуун), Самагалдай (Тес-Хем кожуун), Аяңгаты (Барыын-Хемчик кожуун), Кызыл-Тайга (Сүт-Хөл кожуун), Ак-Тал (Чеди-Хөл), Чыраа-Бажы (Чөөн-Хемчик кожуун), Кызыл-Даг (Бай-Тайга кожуун) база Сарыг-Сеп (Каа-Хем кожуун) суурларда ындыг хевирлиг спортчу объектилер тудуу эгелээн.
Тываның Эрзин кожуунда литий, ниобий, тантал, олово бүдүреринге херек руда казып-тывар «Эльбрусметалл-Литий» КХН улуг инвестиция төлевилелин боттандырып турар.
ТР-ниң Чазааның парлалга албаны.