Бүгү-российжи XII компьютер маргылдаазының түңнел оюнунга Тываны Людмила Чадамба, Мария Наксыл база Вера Васильева төлээлээн. Олар шупту «Интернеттиң азбуказы» деп компьютер билиглериниң курузунуң доозукчулары.
РФ-тиң Күш-ажыл яамызының база Россияның Социал фондузунуң деткимчези-биле Россияның Пенсионерлер эвилели болгаш Москваның күрүнениң гуманитарлыг-экономиктиг университеди маргылдааны организастаан.
Июнь 22-де маргылдааның түңнел оюну болган. Эң-не тергииннерни шилиир онлайн чурумга эрткен түңнел маргылдаага Россияның 77 регионундан база 19 даштыкы чурттардан 350 ажыг финалистер киришкен. Киржикчилерниң хөй кезии 62-ден 70 хар чедир назылыг хоочуннар болган. Оларның аразында эң-не улуг назылыы – 83 харлыг Геннадий Мегалити биле 82 харлыг Лидия Галкина болган.
Марылдааның түңнелинде команда аайы-биле Забайкал крайның пенсионерлери тергиидээн. Мөңгүн шаңнал Владимир облазынга барган, хүлерни — Бурят Республиканың хоочуннары алган.
Кызыл хоорайдан Вера Васильева Сибирь иштинге «Кадыының байдалы кызыгаарлыг хамаатылар аразында эң-не тергиин» деп номинацияга 1-ги черни, а федералдыг чадага 7-ги черни алган.
«Бо маргылдааны бедик деңнелге организастаан-дыр, дыка таарзындым. Бүгү чурттан дыка хөй хоочуннар киришти, өөрүнчүг-дүр. Пенсионерлер компьютер билиглерин быжыглап алгаш, ону амыдыралынга ажыглап болур. Компьютер-биле шагда-ла чоок мен, а смартфонну чоокта чаа ажыглап эгеледим. Дараазында маргылдаага база күзелдиим-биле киржир мен» — деп, Вера Васильева чугаалаан.
Гаджеттерге ажылдаар арга-мергежил улуг назылыг кижилерге чугула дээрзин Людмила Чадамба демдеглээн: «Компьютер, смартфонну пенсионерлер ажыглап билири аажок чугула. Кижиниң билии бедиир, угаан-медерели делгемчиир. Интернеттен күзээн медээңни тып ап болур. Маргылдаага киришкеним сагыш-сеткилимге дыка өөрүнчүг болду. Шупту киржикчилер эр хейлер!»
Маргылдааның даалгаларында кол темазы — чурагайлыг хүрээлеңге саң-хөө билиглери. Маргылдааның деткикчизи болган ВТБ банкының тускай тургусканы хуу кабинет таварыштыр пенсионерлер саң-хөө кылыгларын чоруткан: шыгжаан акшаның немелделерин санап, банкротство чурумунга эргелерин дилеп, орулгазын болгаш чарыгдалдарын анализтеп, дүрген төлээр система (СБП) таварыштыр шилчилгелер кылып база оон-даа өске.
Ол ышкаш финалистер смартфоннарга капсырылгаларны ажыглап билирин база «Яндекс» дилээр системага билиин, даштыкы дылдарга очулгалар кылырын дээш билиглерин көргүскен. Маргылдааның чоруудуун МГГЭУ-нуң студент волонтерлары хайгаарап турган.
Бистиң корр.
Чуруктарны интернеттен алган.
