Март 11-де ТР-ниң Дээди Хуралынга тускай шериг операциязының киржикчилери болгаш ооң хоочуннарының киржилгези-биле “Тываның маадырлары” регионалдыг программаны база катап сайгарып чугаалашкан. Хуралды Каң-оол Даваа боду удуртуп эрттирген. Аңаа ТР-ниң Чазак кежигүннери, депутаттар, ТывКУ-нуң башкылары дээш ук регионалдыг программага хамаарылгалыг улус шупту киришкен.
Тываның Баштыңы Владислав Ховалыгның ТР-ниң Дээди Хуралынга Айыткалының күүселдези-биле, «Маадырларның үези» деп президент программазынга дөмейлештир ажылдап кылган «Тываның маадырлары» регионалдыг программаның төнчү хевирин Хөй-ниити чөвүлелиниң хуралынга сайгарып көргенин сагындыраал.
Чүгле тускай шериг операциязының киржикчилери, хоочуннарын эде өөредир сорулгалыг «Тываның маадырлары» регионалдыг программаның ГероиТувы.рф сайтызы ажылдап эгелээнин хуралга дыңнаткан. Ол сайтыны таварыштыр билиин бедидип, өөренир күзелдиг ТШО киржикчилери документилерин белеткээш, билдириишкиннерни киирип эгелээрин хуралга сүмелешкен.
ГероиТувы.рф сайтыда ук программаның дугайында тодаргай тайылбырны болгаш ооң киржикчилеринге чүден эгелээрин, кончуг таптыг айтып кааны эптиг.
Регионалдыг программаның “Маадырларның үези” президент программазындан бичии-ле ылгалып турар чүүлү, чүгле дээди эртем эвес, ортумак тускай эртем чедип алыр арганы ТШО киржикчилеринге берип турары-биле эптиг.
Болган хуралга “Тываның маадырлары” программа-биле өөредилгениң кандыг хевирлиг болурун ТывКУ-нуң башкызы тодаргай тайылбырлап берген. Ук программа-биле өөренип алыксап турар ТШО киржикчилери боттарының билбейн барган айтырыгларын удур салып, идепкейлиг киришкен.
ТШО киржикчизи, Россияның болгаш Тываның Журналистер эвилелиниң кежигүнү Сайгын Бюрбюнуң хууда бодалын сонуургаан бис.
—Бо дыка ажыктыг программа-дыр. ТШО киржикчилериниң аразында чүгле дээди эвес, а ортумак тускай эртем чедип алыксап турарлар хөй. Ылаңгыя дайын шөлүнге кижиниң кандыызы көстүп кээр. Кадыг-бергени көрген оолдар аразында ылап-ла кончуг эрес-дидим, угаанныг, бүзүрелдиг улус бар болур. Олар эш-өөрүнүң амы-тынын камгалаар дээш, коргуш чок, быжыг туруштуг, шын орукче удуртуп-баштаптар дээрзин ТШО киржикчилери шупту билир. Шак ындыг бүзүрелдиг оолдар соондан хөй кижи эдере бээр. Тайбың амыдыралга ындыг идегелдиг оолдар удуртукчулар болур болза, улам эки ышкажыл. Бо программаның эки талазы, республиканың кадрлар айтырыын шиитпирлээринге, бергелерни кежинге көрүп, ажып эртип шыдапкан улустан удуртукчуларны белеткээри – шын базым деп, амы-хууда ынчаар бодаар мен– деп, ол харыылады.
Ук программа үш чадалыг:
Бирги чадазында, киржир улусту бүрүткээр. Ону 2025 чылдың март 3-тен эгелей берген. Документилерни 2025 чылдың апрель 9-ка чедир хүлээп алыр.
Ийиги чадазында, шилилге мөөрейни эртер. Онлайн тестирование (удуртукчу болурунуң шынарларын илередир) 2025 чылдың апрель 10-дан 2025 чылдың май 7-ге чедир уламчылаар.
Программа киржикчизиниң боду-биле ужуражылгалар 2025 чылдың май 8-тен 2025 чылдың июнь 4-ке чедир уламчылаар.
Үшкү чадазында, дагдыныкчы-биле стажировка болгаш өөредилге эртер. Ол 2025 чылдың сентябрь 1-ден эгелээр.
Өске-даа тодаргай медээни ГероиТувы.рф сайтыдан билип ап болур.
Карина МОНГУШ.
Буян Ооржактың тырттырган чуруу.
«Шын» №9 2025 чылдың март 13
