Август 24-те Тываның Чазаанга, Шахтер хүнүнүң бүдүүзүнде, республиканың хөмүр үлетпүрүнүң ажылдакчыларын шаңнаар байырлыг езулал болуп эрткен.
Тываның Баштыңы Владислав Ховалыг аңаа киришкеш, республика үлетпүрүнүң болгаш бүгү экономиказының стратегтиг адырының бирээзи болур хөмүр-даш үлетпүрүнде ажылдап турар кижилерниң карак кызыл күш-ажылынга болгаш улуг чедиишкиннеринге алдар болдурган байырлал-дыр дээрзин демдеглээн.
«Оларның амыр эвес күш-ажылы бистиң өг-бүлелеривиске чылыгны сөңнеп, сеткилден өөрүп четтириишкинниң болгаш хүндүткелдиң мөгейиинге төлептиг. Ук адырның ажылдакчылары үлетпүр бүдүрүлгезиниң, социал адырның болгаш чуртталга-коммунал ажыл-агый объектилериниң турум ажылдаарын бүзүрелдии-биле хандырып, дыка хөй чылдарның дургузунда энергетиканың айыыл чок чоруун быжыглаарынга улуг үлүүн киирип турарлар. Хөмүржүлеривис-биле билчилгелиг кады ажылдап, ол адырны деткиирин кызыдып чоруур бис» -деп, Владислав Ховалыг чугаалаан.
Байырлыг хуралда, регионнуң удуртукчузу Тываның Дээди Хуралының Даргазы Каң-оол Даваа-биле кады күрүне шаңналдарын тывыскан.
РФ-тиң энергетика сайыдының өөрүп четтириишкин бижиин «Тываның даг-руда компаниязы» КХН-ниң БелАЗ чолаачызы Бюрбю Монгушка тывыскан.
«Шахтер хүнүнүң 75 чылы» база «Россияда хөмүр тывыжының 300 чылы» хөрек демдээ-биле дараазында ажылчыннар шаңнаткан:
Иван Мелехин – «Межегейхөмүр хөмүр-даш компаниязы» КХН-ниң 5-ки разрядтың изекчизи;
Алдын Ондар – «Межегейхөмүр хөмүр-даш компаниязы» КХН-ниң чер адаанда ажылдарның 3-кү разрядтың электрослесары;
Аржаан Оюн – «Межегейхөмүр хөмүр-даш компаниязы» КХН-ниң маркшейдер ажылдарында дагжызы;
Ольга Володина – «Тываның даг-руда компаниязы» КХН-ниң саң-хөө директору;
Александр Алексеенко – «Тываның даг-руда компаниязы» КХН-ниң өрүмнээр дериг-херексел машинизиниң дузалакчызы;
Аяс Тюлюш - «Тываның даг-руда компаниязы» КХН-ниң БелАЗ чолаачызы;
Айдыс Ховалыг – «Тываның даг-руда компаниязы» КХН-ниң экскаватор машинизи.
«Тываның даг-руда компаниязы» КХН-ниң энергомеханика албанының кол энергетиги Дмитрий Конузелевке Тыва Республиканың Баштыңының өөрүп четтириишкинин тывыскан.
«Тываның даг-руда компаниязы» КХН-ниң өөредилге пунктузунуң даргазы Светлана Лини Тыва Республиканың Баштыңының Хүндүлел бижии-биле шаңнаан.
«Тываның даг-руда компаниязы» КХН-ниң 7-ги разрядтың экскаватор машинизи Владислав Сат «Тыва Республиканың алдарлыг ажылдакчызы» хүндүлүг атка төлептиг болган.
ТР-ниң Чазааның парлалга албаны.