Бо чылын республикага 21 чаа кудук кылыр. Оларныӊ ийизи Кызылдыӊ Спутник микрорайонунга база Шагаан-Арыг хоорайга, 17 кудукту суурларга кылыр.
Көдээ суурларныӊ чурттакчылары чаа кудуктар кылырыныӊ дугайында дилээн 2021 чылда Тыва Республиканыӊ Баштыӊыныӊ Чазааныӊ Даргазыныӊ соӊгулда кампаниязыныӊ үезинде чугаалаан.
«Чуртталга-коммунал ажыл-агый яамызы кудук системазын чаартыр болгаш тудуп кылырынга субсидиялар бээриниӊ дугайында кожууннар-биле дугуржулгаларны кылган. Бо ажылдарны «Тыва Республиканыӊ чурттакчыларын 2018–2025 чылдарда кудуктуӊ арыг суу-биле хандырар» деп иштики программаныӊ шугуму-биле акшаландырып турар» – деп, Тываныӊ Чуртталга-коммунал ажыл-агыйыныӊ сайыды Мерген Мынын-оол чугаалаан.
Бирээде, Эрзин кожууннуӊ эрге-чагыргазы планын боттандырып, хүлээникчи тудуг организациязы-биле керээни чарып алган. Мөрен, Бай-Даг, Нарын, Булуӊ-Терек суурларда кудукту казып турар. Бо дөрт суурнуӊ чаа кудуктары июль айда ажылдап эгелээр.
Барыын-Хемчик кожууннуӊ Шекпээр, Бижиктиг-Хая, Барлык, Дөӊ-Терезин, Аксы-Барлык суурларында база кудуктарны казып турар.
Тес-Хем, Барыын-Хемчик, Улуг-Хем кожууннарда кудуктарны бо хүннерде эптеп кылыр.
Чөөн-Хемчик, Кызыл кожууннарга, Кызыл хоорайга кылыр кудуктарныӊ херек чүүлдерин садып ап турар.
Чурттакчыларны кудуктуӊ арыг суу-биле хандырар деп республиканың иштики программазыныӊ хуусаазы 2025 чылга чедер. Республикага ол үе дургузунда суг сордурар системалыг 60 кудук кылыр.
Чаа кудуктарны кылганыныӊ ачызында чурттакчыларныӊ 47,6 хуузу шынарлыг арыг суг-биле хандыртынган болур дээрзин яамы дыӊнадып турар.
/ Р. ДЕМЧИК белеткээн.
