Тыва Республиканың Юстиция яамызының мурнады көөр угланыышкыннарының бирээзи – чонга халас юридиктиг дузаны көргүзери. 2025 чылда ведомствонуң ажыл-чорудулгазын түңневишаан, үнген чылда ону экижидер сорулга салдынган. Халас юридиктиг дуза көргүзер кол организация – Күрүнениң юридиктиг бюрозу 2025 чылда хамаатыларның 6790 дилеглерин сайгарып көрген.
Чылдан чылче халас юридиктиг дуза дилеп турар кижилерниң саны өскенинден Күрүнениң юридиктиг бюрозунуң специалистериниң ачы-дузазы чонга дыка херек. 2024 чылда Күрүнениң эрге-хоойлу бюрозунуң ажылдакчылары 6690 билдириишкин киирикчилеринге ачы-дузазын көргүскен болза, 2025 чылда 6790 хамааты юридиктиг деткимчени алган. Бюронуң юристери муниципалдыг тургузугларже үнүүшкүннер үезинде 407 кижиге дузалаан. 2026 чылда специалистер үнүүшкүннүг ажылдарны уламчылаар.
Хамаатылар бирги ээлчегде, чээли хүлээлгелерниң, алиментилер тырттырарының, социал деткимче хемчеглериниң, чуртталга-коммунал ажыл-агый адырында сонуургалдарын камгалаарының, өскүс уругларның болгаш ада-иезиниң хайгааралы чок арткан уругларның эргелерин камгалаарының, пенсия хандырылгазының, чуртталга айтырыглары, ол ышкаш ниити юрисдикцияның судтарынче янзы-бүрү негелделиг болгаш дилег билдириишкиннерни тургузарының дугайында, чижээ, адазы деп санаар барымдааны тургузар дугайында билдириишкиннерни, шериг албанныг кижини өлген деп чарлаарының дугайында дээш оон-даа өске херектер талазы-биле кээп турар.
Оон аңгыда Күрүнениң юридиктиг бюрозу шимчээри кызыгаарлыг хамаатыларга бажыңынга азы интернет таварыштыр халас юридиктиг дузаны көргүзүп турар. 2025 чылда кадыы кызыгаарлыг кижилерге юридиктиг дуза чедирери-биле 30 үнүүшкүнче үнген. Күрүнениң эрге-хоойлу бюрозу республика иштинде аңгы-аңгы организацияларга халас юридиктиг дузаны чедирери-биле үнүүшкүннүг хемчеглерни база доктаамал эрттирип турар. Эрткен чылын дыңнавас болгаш караа көрбестер ниитилелдериниң регионалдыг салбырларының кежигүннеринге, «Ада-чурт камгалакчылары» күрүне фондузунуң салбырынга дуза дилеп келген кижилерге, Кызылдың Өг-бүлеге болгаш уругларга социал дуза чедирер төвүнге, республиканың школа-интернадынга үнүүшкүннүг консультацияларны эрттирген. Бо ажылдарның түңнелинде 140 кижи дузаны алган.
Юстиция яамызы тус чер бот-башкарылга органнарынга болгаш чонга юридиктиг дузаны халас чедирери-биле республиканың өске-даа яамыларының болгаш ведомстволарының төлээлериниң кожууннарже үнүүшкүннерин организастап турарын демдеглезе чогуур. Эрткен чылын юристер бөлүү Сүт-Хөл, Мөңгүн-Тайга, Тожу, Өвүр, Чөөн-Хемчик, Тере-Хөл кожууннарның 120 хире чурттакчызынга дузалаан.
Тываның юстиция сайыды Евгений Мельников юридиктиг дузаны халас чедирер талазы-биле ажылды түңнеп тура, хамаатыларның чиигелделиг бөлүүнге ооң херектиин демдеглээн: «Юридиктиг дузаны алыр эргелиг хамаатылар бөлүүнүң даңзызын калбартканын, хамаатыларның дилеглериниң көвүдээнин барымдаалап, яамы Күрүнениң юридиктиг бюрозунуң штат санын көвүдедир айтырыгны ажылдап турар» - деп, ооң удуртукчузу дыңнаткан.
ТР-ниң Чазааның парлалга албаны.