Бо хүн, май 21-де Тываның алдар-сураглыг оглу, Россияның камгалал сайыды, Россияның Маадыры, Армия генералы Сергей Күжүгетович Шойгу 65 харлап турар. Ынчангаш майның чылыг, аяс хүннериниң бирээзи Тываның хөй омак-сөөк чоннарының улуг байырлалы дизе чазыг чок.
Улуг Россияның талыгырда ужу-кыдыынга, хожудаңгай девискээрлиг, хөй эвес санныг тыва чоннуң төлээзи – Сергей Шойгу мугур 20 чылдарның дургузунда Россияның чонунуң хүндүткелин болгаш чоргааралын чаалап алган.
1990 чылда ынчангы бөдүүн тудуг инженери оол чурт иштинге айыыл-халап болу бээрге, дарый хемчег алыр, шалыпкын дуза кадар албан черин кыска хуусаада тургузупкан. Алдарлыг чаңгыс чер-чурттуувус РФ-тиң камгалал сайыды апаргаш, чүгле 3-4 чылдарның иштинде ажылы сулараан турган яамыны быжыг бут кырынга чүгле тургузупкан эвес, а российжи армияны делегейде эң күштүг кылдыр хуулдурупкан. Бистиң Тывавыста безин 55-ки адыгжы даг бригадазы, Президентиниң кадет училищези, кадет корпузу тургустунуп, хөй санныг чаңгыс чер-чурттугларывыс чурт камгалының ажылынга хаара туттунган. Бичии чаштарывыс безин шериг езу-чурумунга, быжыг, шыдамык боорунга, база төрээн чуртунга бердинген шынчы камгалакчылары боорунга белен кылдыр кижизиттирип турарлар.
Сергей Шойгунуң РФ-тиң камгалал сайыды кылдыр депшээни дээрге, биче буурай тыва чоннуң бойдустан чаяаттынган чүс-чүс салгал дамчыштыр мөөңнелген күчү-күжү, угаан-медерели, быжыг тура-соруу, солаңгылыг бурунгаар көрүжү бооп турар. Шак мындыг чүгле российжи эвес, а делегей чергелиг оккур угаанныг чаңгыс чер-чурттуглуг болганывыска деңнеп четпес аас-кежиктиг бис, дээрниң хиндиинче ужукан чоргааралдыг бис.
Россияның Маадыры, Армия генералы Сергей Шойгу 55-ки адыгжы даг бригадазын Тывага тургусканы таварылга эвес. Тыва оолдар төрүмелинден кадыг-дошкун байдалдарга шыдамык, берге амыдыралга туруштуг болганы кол барымдаа бооп турар. Бистиң республиканың альпинизм федерациязы камгалал сайыдының деткимчези-биле бүгү-ле хемчеглерни даг адыгжылары-биле кады эрттирип турар. «Делегейниң чеди бедии – Тыва» командазы С. К. Шойгунуң буянныг деткимчези-биле хөй диптерниң шыпшыынга четкен болгаш, амгы үеде байлак арга-дуржулгавысты даг адыгжыларынга дамчыдып берип турарывыс дээрге, бистиң алганывыс улуг буянның эргидип турар дорт хүлээлгевис бооп турар.
Алдарлыг чаңгыс чер-чурттуувус камгалал сайыды, Россияның Маадыры, Армия генералының юбилейинге тыва чоннуң өмүнээзинден бистер – альпинистер Сергей Күжүгетовичиге кайгамчыктыг күчүлүг тура-соруу тендиш дивес быжыг арттарын, мерген угааны, эгээртинмес күчү-шыдалы төрээн чурттувусту, төрээн чонувусту улам бедик сайзыралче чедирер дээрзин, чүрээвис ханызындан күзедивис!
Маадыр-оол Ховалыг, ТР-ниң альпинизм федерациязының президентизи, Россияның рекордсмени. #Шын