ТР-ниң Баштыңы Владислав Ховалыг ук адырда ажылдап чоруур чаңгыс чер-чурттугларынга байыр чедириишкининиң чылыг-чымчак сөстерин бодунуң блогунга бижээн:
— Хүндүлүг, социал адырның ажылдакчылары, профессионал байырлалыңар-биле байыр чедирип тур мен!
Социал педагогтуң үүлези амыр эвес, нарын ажыл. Ынчалза-даа дуза хереглээн улуска хүн бүрүде моральдыг болгаш материалдыг деткимче кадар мергежилди шилип алганыңар – буянныг үүле-дир. Сагыш-сеткили хоозураан кээргенчиг улусче хүн бүрүде туруштуг базымнарны кылып чоруур силер. Шак-ла ындыг кижилерге ол санында-ла келир үеде чаагай амыдыралче идегелди оттуруп чоруур буянныг улус-тур силер.
Кижи бүрүзүнүң сагыш-сеткилин үлежип, оларны дыңнап шыдаар эң-не быжыг туруштуг кижилер социал адырда ажылдап чоруур.
Сеткилимниң ханызындан силерге аас-кежикти болгаш чаагай чорукту күзедим!
Чурукту интернет четкизинден алган.