Бөгүн, январь 30-де, чазак бажыңынга болган хуралга республиканың школачылары, ортумак өөредилге черлериниң сургуулдары, дээди өөредилге чериниң студентилери январь 31-ден февраль 7-ге чедир онлайн чурумче шилчиир дугайында шиитпирни хүлээп алган.
Бо хүнге чедир 9-11 классчылар школага кээп өөренип турган.
Сөөлгү хонукта республикада 407 кижиниң халдавырлыг аарыгдан аарааны илерээн. Оларның 143-ү назы четпес уруглар.
Нарыыдап келген байдалдың уржуундан дээди болгаш ортумак өөредилге черлериниң студентилерин, школачыларны долузу-биле онлайн чурумче шилчидер ужурга таварышканын ТР-ниң Баштыңы В.Ховалыг социал четкиде бодунуң хууда блогунда демдеглээн.
Тываның күрүне университединиң баштаар чери студентилерниң канчаар өөренириниң дугайында шиитпирни кымдан-даа хамаарылга чокка, чүгле Росхереглелхайгааралдың сүмези-биле хүлээр.
Сөөлгү айда Тывада ниитизи-биле 3153 кижиниң аарааны илерээн. Кызылдың эмнелгелеринде 1122 кижи бо хүннерде эмнедип чыдар. Сөөлгү хонукта 213 кижи аарыгдан сегээн. Калл-төптерде 63 операторлар телефон таварыштыр чоннуң айтырыгларынга харыылап турар. Эрткен хонукта ниитизи-биле 4875 кижи республиканың калл-төптеринче долгаан.
Халдавырлыг аарыг ковидке удур вакцинаның 1 дугаар кезээн бо хүнге чедир - 147 672 хамааты тарыдып алган. Спутник лайт деп вакцинаны - 36 541 кижи салдырган. Катап тарылганы - 37 369 кижи эрткен.