«2021–2024 чылдарда Тыва Республикага хөй-ниитиниң чурумун хандырары болгаш кем-херек үүлгедиишкиннеринге удурланыры» деп күрүне программазында кирип турар ажылдарның бирээзин боттандырары-биле Бай-Тайга кожууннуң Шуй суурунга болгаш Кызыл хоорайның Вавилин ээтпээнге участок төлээлери шагдааларга чурттаар бажыңнарны тудар. Программаның бир хемчээ – чуртталга бажыңын полицияның пунктузу-биле кожа тудары.
Чер адаандан суг үндүререр кудуктуг, оду үр үеде кывар суугулуг, тудуш гаражтыг бажыңның төлевилели бадылаттынган.
2022 чылда айыттынган тудуг ажылдарынче 20,2 млн рубль көрдүнген болгаш беш ийи аал чурттаар бажыңнарны тудары планнаттынган турган. Ол ийи аал чурттаар (2 квартиралыг) бажыңнарның бирээзинге полиция пунктузу турар. Ынчалзажок тудуг материалдарының өртектериниң болгаш тудугжуларның ажылының төлевириниң өскени-биле холбашкан социал-экономиктиг байдалды барымдаалап, объектилерниң тудуунуң материалдарын, ажылдың өртээн эде санаар ужурга таварышкан. Ынчангаш бөгүн үстүнде айыттынган акша-хөреңгиге дүүштүр чүгле ийи бажыңны тудар арга бар болуп турар.
Ол ийи бажыңны тудар күрүне дугуржулгазын чарарынга чарлаттынган мөөрейге «Бастион» ААН тиилээн болгаш ук ажылды эгелеп, Вавилин ээтпээнде тудуг тудар черниң бүрүткел айтырыгларын шиитпирлеп эгелээн. Шуй суурда тудуг бригадазы тудугга тускайлаттынган черни шинчилеп, бажыңның таваан салырынга белеткенип турар. Чуртталга бажыңнарын ажыглалга киирер хуусаазы – 2022 чылдың төнчүзү.
Туттунган чуртталга бажыңнарынга участок шагдаалары тус черге ажылдап турган үезинде түр када чурттаар. Күрүне программазын боттандырары-биле, кожууннарда ажылдап турар участок шагдаалары чурттаар кылдыр дараазында беш бажыңны тударын планнап турар.
Ш. ОНДАР белеткээн.
Чурукту интернет четкизинден алган.