Тываның Баштыңы Владислав Ховалыг июнь 18-те Президентиниң Сибирь федералдыг округта бүрүн эргелиг төлээзиниң оралакчызы Александр Орехов болгаш Тыва Республика талазы-биле федералдыг инспектор Александр Вавилихин-биле ужурашкан.
Александр Валерьевич Ореховтуң чугаазы-биле алырга, Тыва өөредилге албан черлерин тударының талазы-биле Сибирь федералдыг округта мурнакчы черде турар. Ол, шынап-ла, ындыг. Чурттуң Президентизиниң деткимчези-биле бис хары угда 8 школаны тудуп, барык 5 муң хире чаа өөредилге олуттарын тургузуп тур бис. Тудуг ажылдарын чыл төнчүзүнге чедир доозар сорулгалыг бис. Чугула айтырыгларны, регионнуң эки дуржулгазын, акшаландырыышкынның айтырыгларын, а ол ышкаш тудугга хыналданың дугайында чугаалаштывыс. Чамдык объектилерге Александр Валерьевич боду чедип чораан.
Кызылдың чоогунда ийи улуг школага уруглар бо чазын-на өөрени берген, 1600 хире өөредилге олуттары тургустунган. База бир школа эжиктерин сентябрь 1-де ажыдарынга белен – деп, бодунуң блогунда В. Ховалыг бижээн.
Бистиң корр.
Чингис СААЯНЫҢ тырттырган чуруктары.
“Шын” № 45 2024 чылдың июнь 19
