«Демография» национал төлевилелдиң ачызында бүгү чуртта уруглар садтарынче оочур айтырыы кызырлып эгелээн. Эрткен чылын найысылал Кызылдың «Спутник» микрорайонунга 27 дугаарлыг чаа уруглар сады ажыттынган. Бо чылын ол бир чыл болган байырлалын демдеглеп турар.
Ажылдаа-ла, бир чыл болуп турар уруглар садында чаштарның бүгү талалыг сайзыралынга шупту эки байдалды тургускан. Ында чаштарга дылдар өөредиринден эгелээш, немелде өөредилгеже угланган янзы-бүрү бөлгүмнер, медицинаның бир хевири — галотерапия чорудар тускай дустуг өрээл бар.
«Дустуг куй» — уруглар садының чаштарының эң-не ынак өрээли. Уруглар дустуг өрээлче бөлүк аайы-биле график езугаар, айыткан шагында барып турар. Ооң ишти дээвииринден эгелээш, шалазынга чедир бүрүнү-биле дустуг блоктар-биле шыптынган.
— Дустуг өрээлди бо чылдың сентябрьда ажыттывыс. Ону уруглар садының бодунуң акша-хөреңгизи-биле кылдырып алдывыс. Новосибирск хоорайдан специалистерни чалаан бис. Олар маңаа 2 неделя дургузунда ажылдаан. Бо өрээлге уруглар садының эмчизи уруглар-биле ажылдап турар. Ясли бөлүүнүң чаштарындан эгелээш, шупту ында кадыын быжыктырып эгелээн — деп, Кызылдың 27 дугаарлыг уруглар садының директору Олча Тюлюш чугаалаан.
Галотерапия үргүлчү челбинер уругларга, ылаңгыя ЛОР аарыгларын эмнээринге дыка ажыктыг дээрзин ук уруглар садының эмчизи Сай-Суу Иргит тайылбырлаан: «Дустуг өрээл тыныш органнарының аарыгларын эмнээринге, ылаңгыя ОРВИ, бронхит аарыгларын болдурбазынга ажыктыг. Амгы үеде сооктар дүжерге, уруглар хөй аарып турар. Бо өрээлге уруглар ойнавышаан, дустуг агаарны киир тынар кылдыр янзы-бүрү ойнаарактар-биле дерээн. Уруглар маңаа неделяда 2–3 катап кирер аргалыг».
Ол ышкаш «Угулзада» чаштарга тыва чоннуң амыдыралы, национал культуразын таныштырар национал эт-сеп, дериг-херекселдер база методиктиг материалдар-биле шиметтинген кабинет бар. Бо өөредилге албан чери чаштарга төрээн дылын өөредиринче улуг кичээнгейни угландырган.
— Уругларга тыва дылды ортумак бөлүктен өөредип турар. А ясли бөлүүнүң бичии чаштарынга тыва дылды дүъш соонда бөлгүм кылдыр чорудуп турар. Бистиң чаштарывыс шупту тыва дылынга чугаалажып билир. Тыва дыл кабинеди уруглар сады ажыттынгандан бээр ажылдап эгелээн.
Бисте немелде өөредилге бөлгүмнери болгаш ооң специалистери хөй. Ол дээрге дефектологтар, психологтар, хөгжүм, күш-культура удуртукчулары, хүреш башкылары-дыр – деп, директор Олча Тюлюш чугаалаан.
«Демография» национал төлевилели-биле эрткен чылын туттунган 280 олуттуг «Угулза» уруглар садында бо хүнде 14 бөлүк, ооң 4-ү ясли бөлүктери ажылдап турар.
Алдынай СОЯН белеткээн.
Чуруктарны интернет четкизинден алган.
«Шын» №89 2023 чылдың ноябрь 22
