Чуртунга, чонунга буян чедирген маадырларның аттарын кудумчулар, албан черлеринге тыпсыр чаагай чаңчыл бистиң чуртувуста бар. Ынчалдыр төлептиг кижилерниң дугайында сактыышкын мөңгежиттинер.
Удавас Кызыл хоорайга база өске-даа тыва суурларга Донбасстың камгалакчылары болгаш украин нацизмге удур демиселге маадырлыг чоруун көргүскен чаңгыс чер-чурттугларывыс аттары-биле адаан кудумчулар көстүп келир. Ол дугайында Тываның Баштыңы Владислав Ховалыг бо хүн дыңнаткан:
“Бо амгы маадырларывыстың аттары чонувустуң угаан-сагыжынга мөңгеде уттундурбайн артып калыр кылдыр болдунар-ла чүүлдерни кылыр ужурлуг бис. Бистиң чаңгыс чер-чурттугларывыстың эрес-дидим, коргуш чок чоруу чуртувустуң маадырлыг чоруктар дептеринче мөңгеде киир бижиттинер. Маадырларывыс аттары-биле кудумчуларывысты адаар, школаларывыска оларның ат-сывын тыпсыр чаагай чаңчылывысты уламчылаар бис”.
Тываның Баштыңының дыңнатканы-биле, Кызыл хоорайның Спутник микрорайонунда чаа тыптып келген чуртталга комплекизинде чаа тургустунуп, туттунуп турар кудумчуну Россияның Маадыры “Спарта” деп тускай хайгыыл батальонунуң командири Донецк Улус Республиканың гвардиязының полковниги Владимир Артемович Жоганың ады-биле адаар шиитпир хүлээп алдынган.
“Воха” деп чажыт аттыг Владимир Жога чүгле 28 харлыг турган хирезинде, чонунуң, чуртунуң хосталгазы дээш нацизм-биле демиселге бодунуң көскү изин арттырып каан. Ол март 5-те Волноваха хоорайдан тайбың чурттакчыларны от айыылындан дестирип үндүрүп турар операция үезинде маадырлыы-биле амы-тынындан чарылган. Ол-ла хүн ДУР-нуң баштыңы Денис Пушилин аңаа ДУР-нуң Маадыры атты мөчээниниң соонда тывыскан. Ооң сөөлүнде РФ-тиң Президентизи В. Путин комбатка Россияның Маадыры атты мөчээниниң соонда тывыскан. Ынчалдыр Жога донецк ополченнериниң аразындан бир дугаар Россияның Маадыры болган.
Донецк Улус Республиканың тоолчураан бир дугаар Баштыңы болгаш Маадыры генерал-майор Александр Владимирович Захарченконуң ады-биле Донбасстың маадырлыг удурланыышкыны дорт холбашканын билир бис, ынчангаш бо маадырның ады-биле Кызыл хоорайның Вавилин ээтпээнде чуртталга бажыңнары туттунуп турар районда чаа кудумчунуң адын адаар.
Ынчалдыр Тыва Украинада тускай операцияга, Донбасстың чурттакчы чону биле дайынчыларынга бодунуң деткимчезин илередип турары ол. Ооң-биле кады Тывадан барып, чуртувустуң хосталгазы дээш нацизмге удур демиселге маадырлыг чоруун көргүскен чаңгыс чер-чурттугларывыстың алдар-адын мөңгежидери-биле оларның аттарын кудумчуларга тыпсыр. Чеди-Хөл кожууннуң төвү Хову-Аксы суурда кудумчуну украин нацизм-биле демиселге амы-тынындан маадырлыы-биле чарылган тус чер чурттуг анаа дайынчы Арсен Чульдумнуң ады-биле, Таңды кожууннуң Кочетово суурунда кудумчуларны тус черниң оолдары улуг лейтенант Экер Оюннуң база сержант Виктор Оюннуң аттары-биле адаар дээнин Тываның Баштыңы дыңнаткан. Шак ындыг шиитпирлерни республиканың өске кожуун-сумуларынга хүлээп алыры чугаажок дээрзинге бүзүрелин Владислав Ховалыг илереткен.
