Ханты-Мансийск хоорайга июнь 11-ден 16 хүннеринде болган «Россияның студент чазы» деп Бүгү-российжи фестивальга бүгү чурттан 68 делегеция, ооң иштинде 2000 ажыг студентилер киришкен.
Фестивальга Тываны Тываның политехниктиг техникумунуң сургуулдарының «Улаатай» коллективи төлээлээн. Муң ажыг чогаадыкчы коллективтерниң аразындан тыва сургуулдарның «Ыдык дажым, мени камгала» деп программазын эксперттер улуг үнелээш, фестивальдың лауреады атты тывыскан. Эң-не тергиин 4 программа аразынче киргеш, тускай шаңналга төлептиг болганнар.
Ол ышкаш Тываның делегациязындан Республиканың политехниктиг техникумнуң сургуулу Б.В. Шагачы «Улусчу ыры» номинациязынга тергиидээш, I чергениң лауреады болган. «Улаатай» коллективинге фестивальдың киржикчизиниң сертификадын тывыскан.
Бо дээрге «Россия – аргаларның чурту» деп президент платформазының, «Биргилерниң шимчээшкини» деп Россияның уруглар болгаш аныяктар шимчээшкининиң база Аныяктар ажыл-херээниң талазы-биле федералдыг агентилелдиң деткимчези-биле Россияның Аныяктар эвилели болгаш Ханты-Мансийск автономнуг округу – Юграның Чазааның боттандырып турар улуг төлевилели-дир.
/ ТР-ниң Өөредилге яамызының медээзинден.
"Шын" №45 2023 чылдың июнь 21
