«Сорунза» губернатор төлевилели
«Сорунза» губернатор төлевилелиниң боттанылгазы-биле республиканың көдээ сумуларында культура одаглары немежип турар. Оларның чамдыызы ажыглалче кирген, а бир чамдыызының тудуу ам-даа уламчылап турар.
Сүт-Хөл кожууннуң Кара-Чыраа сумузунда «Сорунза» губернатор төлевилели-биле тудуп турар культура одааның тудуунуң ажыл-чорудулгазын ооң директору Лориса Ыдыш таныштырган.
«Суурувуска улуг, чырык, культура одаан шагда-ла күзээн бис. «Сорунза» губернатор төлевилелиниң ачызында чонувустуң күзели бо чылдың апрель айдан боттанып эгелээни бо. Бүгү назынында тудуг ажылынга ажылдап чораан чаңгыс чер чурттуувус Шолбан Сатович суурда ажыл чок оолдарны эвилелдеп алгаш, культура одааның таваан салып, тудугну эгелээн. Барык дөрт ай дургузунда демниг ажылдаан түңнелинде тудуг ажылы колдуунда адакталып турары бо. Чылыг дамчыыр четкизин кошкаш, котелду тургускаш, отту салып шенээн. Чылыг эки дамчып турар, ажырбас болган. 80 олуттуг культура одаанда ном саңынга тускай өрээлди база немей туткан.
2023–2024 чаа өөредилге чылының эгезинде, чаа культура одаанче көже бээри планывыста көрдүнген. Тудуг материалдары-биле ТР-ниң Культура яамызы хандырып турар. А ажылчын күш дээрге сумунуң бодунуң эки турачылары. Тудугжу бригадада 15 хире аныяк оолдар бар. Сумунуң херээжен чону арбаннар аайы-биле ээлчежип алгаш, тудугжуларны аъшкарып-чемгерип турар. Мал-маганныг оолдар хойун-даа дөгерип, эът-чемин эккээр-дир» — деп, тус черниң культура одааның директору тайылбырлады.
Кара-Чыраа сумузунуң Дарый Монгуш аттыг көдээ культура одаанда 2 чогаадыкчы ажылдакчы, ийи таңныыл, ийи аштакчы база ном саңының ажылдакчызы хаара туттунган.
Кара-Чыраа сумузунда уран талантылыг ажы-төл хөй. Бо суурдан «ужуп» үнген ыраажылар-даа бар. Бичии уругларның ырлаар, самнаар, а улугларның аргыыр, даараар дээн ышкаш янзы-бүрү бөлгүмнер ук культура одаанда ажылдап турар. ТР-ниң Культура яамызы тудуг материалдарындан аңгыда, амгы шагның тускай бүрүн четчелеп каан ыры-хөгжүм аппаратуразын база белекке берген.
«Кайыын-даа улуг артистер кожуунга келгеш, бистиң сумунуң культура оран-савазы бичии дээш, келбес турган. Ам улуг, чырык оран-савалыг апарганывыска сумунуң чону өөрүп, четтирдивис. Театр артистерин четтикпейн манаар бис. Тудугда ажылдап турар чаңгыс чер чурттугларывыстың патриотчу чоруун база демдегледим» – деп, Лориса Ыдыш немеди.
Кара-Чыраа сумузунда ниитизи-биле сес чүс ажыг чурттакчы бар. Оларның чартыындан хөйү аныяктар. Кызылдың уран чүүл колледжизиниң бо чылгы доозукчузу Отчугаш Доңгак культура одааның уран чүүл удуртукчузу апарганы – чаңгыс чер чурттугларынга улуг өөрүшкү.
Айдың ОНДАР.
Буян ООРЖАКТЫҢ тырттырган чуруктары.
"Шын" №59, 2023 чылдың август 9