Республика эмнелгезиниң гериатрия төвүнүң ажылдакчылары ТР-ниң Кадык камгалал яамызының штаттан дашкаар кол гериатры Вероника Хертектиң удуртулгазы-биле “Улуг назынныглар” федералдыг төлевилелдиң хемчеглерин боттандырары-биле, Улуг-Хемниң кожууннар аразында медицина төвүнге база Хайыраканның бажың-интернадынга барган. Ооң кол сорулгазы – ажылды организастаарынга методиктиг дузаны чедирери, медицина болгаш социал албан черлериниң кады ажылдажылгазын экижидери.
Төптүң специалистери гериатрия кабинединиң болгаш ооң чыдар талазының ажылы-биле таныжып, улуг назынныг пациентилерниң канчаар эмчилеп турарын хайгаарап, кожуунда эмчи дузазын шынарлыг чорудуп турарының экспертизазын чоруткан.
Эмнелгениң болгаш бажың-интернаттың удуртулгазы-биле хуралды база эрттирген. Улуг назынныгларга эмчи дузазын чедирер талазы-биле албан черлериниң аразында кады ажылдажылганы сайгарып, кожуунга эмчи дузазын чедирер талазы-биле сорулгаларны салган. Ол ышкаш “Улуг назынныглар” федералдыг төлевилелдиң боттанылгазының көргүзүглерин, кээп ужарын болгаш сыныктарны болдурбазының, үр үеде ажаалга системазының болгаш деменцияга удур планны ажылдап чорудар аргаларын өөренип көөр төлевилелдерниң боттанылгазын база чугаалашкан.
Түңнелинде, улуг назынныгларга эмчи дузазын, ооң иштинде эмнээшкин болгаш профилактика ажылдарын сайзырадыр сүмелерни берген. Пациентилер-биле канчаар ажылдаарынга хамаарышкан тускай аргаларны база саналдаан. Келир үеде олар Россияның геронтология талазы-биле эртем-клиниктиг төвүнүң кол экспертери-биле экран таварыштыр арга-сүмени ап, билиглерин болгаш чаңчылдарын сайзырадыр өөредиглиг хемчеглерге киржир аргалыг болур.
Улуг назынныглар хүнү-биле төптүң мурнундан чаагай күзээшкиннерни болгаш узун назылаашкынны нептередир сорулгалыг кижилерге скандинав даянгыыштарны дамчыдып берген.
Чыжыргана СААЯ.
“Шын” №75 2024 чылдың октябрь 2
