Республиканың школаларынга кижизидилге талазын харыылаар аңгы адыр тургузар дугайында шиитпирни ТР-ниң Баштыңы хүлээп алган. Ол дугайында Владислав Ховалыг социал четкиде бодунуң блогунда медеглээн:
- «Сайыттың оралакчыларының бирээзинге кижизидилге ажылын дагзып каар дугайында меңээ сүмелээн турду. Мен бодаарымга, ооң-биле бо чидиг айтырыгны шиитпирлээри болдунмас-тыр. Чүге дээрге ук айтырыг чүгле респубика иштинге эвес, а бүгү чурт деңнелинге шиитпирлээр айтырыг-дыр.
Кандыг арга-биле, канчаар школаларга кижизидилге ажылын эгидери - специалистерниң херээ-дир. Кадет корпуска болган айыыл-халапка хамаарыштыр чогуур ажылдарны чорудуп, кичээнгейлиг сайгарылганы аңгы-аңгы адырлардан специалистерниң киржилгези-биле күжениишкинниг ажылды чорудуп турар бис.
Совет үениң школаларының кижизидилгезинден долузу-биле ойталаанывыс кончуг багай дээрзи эксперттерниң дузазы чокка-ла билдингир.
Бо херекти ужур эдертип хаап кааптары болдунмас. Бир-ле шиитпирни үндүрүп, чогуур ажылдарны чорудар ужурлуг бис. Ынчангаш 2023 чылдан эгелеп школаларга ажылдаар тускай специалистерни белеткээр даалганы ТР-ниң Чазааның социал блогунга бердим. Ук специалистер өөредилге черлеринге кижизидилге талазын харыылаар улус болур.
Олар чүгле школа директорларынга дузалажыр эвес, а бичии уругларның хөй-ииити шимчээшкиннери-биле харылзажып, кижизидилге ажылын күштелдирер.
Ол системаны тургузуп алыр дээш, бодувус хемчеглерни чорударын кызыдар бис. Улуг орук бичии-бичии базымнардан эгелээр».
Ук шиитпирге хамаарыштыр ТР-ниң Өөредилге сайыдының болгаш өске-даа өөредилге адырында ажылдап чоруур ажылдакчыларның санал-оналдарын дараазында бижиир бис.18