Тываның Баштыңы Владислав Ховалыг Улусчу фронтунуң регионалдыг салбырының удуртулгазы-биле ужуражылганы эрттирген.
Ужуражылга үезинде элээн каш айтырыгларны шиитпирлээр талазы-биле кады ажылдажылганы, ооң иштинде «Улусчу фронт. Шупту чүүлдү Тиилелгеже!» деп төлевилелдиң чорудуу-биле хамаатыларның дилеглеринге база тускай шериг операциязының киржикчилеринге деткимче көргүзериниң талазы-биле айтырыгларны сайгарып чугаалашкан. Келир неделяда республикадан ТШО киржикчилеринге гуманитарлыг деткимчениң ээлчеглиг партиязын чорударын планнап турар.
— «Шупту чүүлдү Тиилелгеже» деп төлевилелдиң эгелээшкиннеринде идепкейлиг киржип турар бис. Бодум хуумда ТШО киржикчилеринге немелде дериг-херекселдер, автотранспорт садып алырынга бизнестиң курлавырларын киириштирер ажылдарны чорудуп турар мен — деп, Владислав Ховалыг ужуражылганы түңнеп тура, чугаалаан.
Ужуражылганың киржикчилери 2023 чылдың декабрьда Россияның Президентизи В.В. Путин-биле «дорт харылзаага» келген дилеглерниң күүселдезиниң чорудуун база сайгарып көрген. Күрүнениң Баштыңының адрезинге Тываның чурттакчыларындан 1765 дилег кирген. Ол айтырыгларны күүсекчи эрге-чагырга органнары биле тус черниң бот-башкарылгазы сайгарып көргеш, ажылдаар кылдыр алган.
Владислав Ховалыг ол дилег айтырыгларга хыналданы чорударын, ооң эрге-байдалын онза чугулалап база ооң күүселдезиниң түңнелдерин кожууннарга үнүүшкүннер кылып тургаш, чурттакчы чонга таныштырарын организастаарын Тыва Республиканың Баштыңының администрациязының болгаш ТР-ниң Чазааның Аппарадының удуртукчузу Юрий Ананьинге дааскан.
Эрге-чагыргага адрестээн айтырыгларның хөй кезии оруктар септелгези болгаш чаартылгазы болуп артпышаан. Регионалдыг күүскомнуң кежигүннери эксперттер болуп, ол талазы-биле ажылдарның шынарын контрольда алган. Бо неделяда Улусчу фронтунуң кежигүннери ТР-ниң орук транспорт яамызының ажылдакчылары-биле катай найысылалдың «Вавилин» микрорайонунче үнүүшкүннү кылган, ында чаа школаже кирер орукта септелгелер чоруп турар.
Улусчу фронтунуң регионалдыг күүскомунуң удуртукчузу Саима Далчин Кызыл хоорайның Убсу-Нурская кудумчузунда хөй аал чурттаар бажыңнарның тудуунда четпестерни эде кылыр хүлээникчи тудуг организациязының ажылының күүселдезиниң кошкаан демдеглээн. Ол айтырыгны дүрген шиитпирлежиринге Тываның Баштыңындан дузаны дилээн.
Ужуражылганың кол айтырыы ТШО зоназынче ээлчеглиг гуманитарлыг деткимчени чорударынга белеткел ажылдары болган. Аъш-чем, идик-хеп, эмнер, техника болгаш транспорт сөөртүрүнге улуг чүък автомашиналары херек.
Деткимче көргүзер күзелдиг кижилерге Улусчу фронтунуң офизинде чыылданы организастап турар: Кызыл хоорай, Тыва эки турачылар кудумчузу, бажың 3. Харылзажыр телефон: 8(39422)2-10-50.
Июль айның төнчүзүнде гуманитарлыг чүъктү Донецк болгаш Луганск Улус Республикаларда, Запорожье болгаш Херсон областарында шериг албанын эрттирип турар дайынчыларга чедирер.
ТР-ниң Чазааның парлалга албанының медээзинден.
Чурукту интернеттен хоолгалаан.
"Шын" №54 2024 чылдың июль 20
