2024 чылда Тывага «Улусчу картофель» губернатор төлевилелиниң боттанылгазынче 7,6 сая рубльди аңгылаан.
Ук төлевилел боттарын картофель үрезини-биле хандыртынып шыдавас, амыдыралы чегей өг-бүлелерге көрдүнген дээрзин сагындыраал.
Тывада 96 муң өг-бүле чурттап турар, оларның дөрттүң бири шыдалы кошкак өг-бүлелерге хамааржыр. Эрткен чылын «Улусчу картофель» төлевилел-биле 8420 өг-бүлеге 25-тен 50 килограмм чедир картофель үрезинин үлээн.
Кызылдың мэриязының социал политика талазы-биле департаментизи бо чылын 1453 шыдалы кошкак өг-бүлеге 50–50 килограмм картофельди үлээн.
«Улусчу картофель» төлевилел-биле бо чылын 22454 өг-бүлеге деткимчени көргүзер. Эвээш хөреңгилиг өг-бүле бүрүзүнге 50 кг картофель үрезинин үлээр.
«Улусчу картофель» деп губернатор төлевилелин республиканың Баштыңы Владислав Ховалыгның даалгазы-биле 2022 чылдан тура боттандырып эгелээн. Ол регионнуң чазааның хөй ажы-төлдүг болгаш хандырылгазы кошкак өг-бүлелерге кризиске удур хемчеглериниң бирээзи болган. Бо программа мурнунда ажылдап турган «Социал картофель» биле «Бажың бүрүзүнге — картофель» деп төлевилелдерни каттыштырган.
2023 чылда төлевилелдиң боттанылгазының түңнелдери-биле ооң киржикчилери бодунуң дузалал ажыл-агыйларындан 863,4 муң тонна картофельди алганнар. Таңды кожуундан төлевилелдиң киржикчилери 62,7 муң тонна «ийиги хлебти» ажаап алганнар.
Төлевилелди үш чылга санап каан, ол 2024 чылдың ноябрь айда доостур. Ооң сорулгазы — картофель үрезининге хереглелдиг өг-бүлелерге деткимче көргүзери. 2023 чылда ук төлевилелди өске регионнарга база ажыглаарын сүмелээн.
Артур ХЕРТЕК белеткээн.
Чурукту интернет четкизинден алган.
«Шын» №37 2024 чылдың май 22
