«ТР-ниң улустуң башкызы» деп хүндүлүг атка төлептиг болган Сүт-Хөл кожууннуң Бора-Тайга ортумак школазының орус дыл болгаш литература башкызы Розалия Куулар: «Көдээ черде ажылдап чоруур башкыларның ажыл-ижин үнелеп турарынга өөрүп тур мен. Боттарының кижизиг чоруу, эртем-билии-биле мени алдаржыдып чоруур өөреникчилеримге болгаш бодумнуң башкы мергежилимге чоргаарланып чоруур мен. Езулуг башкы болуру – ажы-төлге болгаш бодунуң мергежилинге ынак болуру-дур» – деп, өөрүшкүзүн илереткен.
Розалия Бораевнаның ниити башкы стажы – 46 чыл. Ол «ТР-ниң өөредилгезиниң алдарлыг ажылдакчызы» болгаш «РФ-тиң Чырыдыышкынының тергиини» хүндүлүг аттарның эдилекчизи. Ам хоочун башкының хөрээнде «ТР-ниң улустуң башкызы» деп хөрек демдээ немешкени бо.
Хоочун башкы бүгү назынында бо хүнге чедир чаңгыс-ла Бора-Тайга школазында орус дыл болгаш литература башкылап келген. Ол өөреникчилери чылдың-на регион чергелиг орус дыл олимпиадаларынга чемпионнап турарынга чоргаарланып чоруур. Амгы үеде студентилер апарган эки өөреникчилери Айза Ондарны, Чай-Хаан Ондарны, 9-ку классчы Ангелина Ховалыгны чоргаарал-биле демдеглеп чугаалады.