Тываның аңгы-аңгы булуңнарында бичии уругларга янзы-бүрү спортчу шөлчүгештерни 2023 чылда ажыткылаан. Чижээлээрге, Тожу кожууннуң Ырбан сумузунда бо кыжын хөккейлээр дош чуңгуну кудуп кылган.
РФ-тиң Президентизи Владимир Путинниң үзел-бодалы-биле тургустунган «Уруг бүрүзүнүң чедиишкини» национал төлевилелдиң ачызында кылдынган шак бо объект тус черниң бичии уругларының хостуг үезин эрттирип, чуңгулаар, конькилээр, хөккей ойнаар чери апарган.
Ооң дугайында ТР-ниң Баштыңы Владислав Ховалыг бодунуң социал четкиде блогунда мынчаар демдеглээн:
«Тожу кожууннуң Ырбан сумузундан видео чагаажыгаш алдым. Чедери берге ырак черде сумунуң ажы-төлү хостуг үезин чаа кылдынган чуңгуда эрттирип турары өөрүнчүг-дүр. Бо бүгү «Уруг бүрүзүнүң чедиишкини» национал төлевилелдиң акшаландырыышкыны-биле туттунган дээрзин сагындырып каайн» – деп чугаалаан. Владислав Товарищтайовичиниң медеглээни-биле алырга, «Өөредилге» национал төлевилелдиң деткимчези 2023 чылда ниитизи-биле 20 сая рубль болган. Ол деткимче акша-биле Тываның 11 сумузунда бичии уругларга спортчу шөлчүгештерни чаартып кылган. Оларның аразынче Ырбан сумузу база кирип турар. Оон аңгыда, ийи сумунуң көдээ спорт залдары бүрүнү-биле дериг-херексел-биле дериттинген. Бии-Хем кожууннуң Туран хоорайның 1 дугаар школазының спорт залының септелгези кончуг бедик деңнелде кылдынган дээрзин Владислав Ховалыг демдеглээн.
2024 чылда «Уруг бүрүзүнге чедиишкин» национал төлевилелдиң ачызында Тыва Республика 20 сая рубль деткимчени алыр. Республиканың 13 көдээ школазының спортчу инфраструктуразын чаартыры планда көрдүнген.
«Уруг бүрүзүнге чедиишкин» федералдыг төлевилел дээш РФ-тиң Президентизи Владимир Путинге Тываның Баштыңы өөрүп четтиргенин илереткен.
«Уруг бүрүзү салым-чаяанныг. Ону ажыдары – хүлээлгевис. Россияның чедиишкини шак ында» – деп, РФ-тиң Президентизи «Уруг бүрүзүнүң чедиишкини» деп федералдыг төлевилелге хамаарыштыр чугаалаан дээрзин сагындыраал.
А. ОНДАР белеткээн.
"Шын" №2 2024 чылдың январь 13
