Чөөн-Хемчиктиң Бажың-Алаактан 7 өөреникчи болгаш башкызы дүүн орук озал-ондаанга таварышкан. Олар Республиканың 1 дугаар эмнелгезинде эмнээшкинни ап турар. Уругларның байдалын эмчилер ортумак, харын-даа элээн эки деп түңнеп турар. Аас-кежик болуп, уруглар улуг кемдээшкиннер болгаш сыныктар чок болган, школачыларга болгаш башкызынга кезиишкин кылыры негеттинмейн турар. Оларга чүгле чогуур ужурлуг терапия эмнээшкиннерин чорудуп турар. Авария болган хүнде уруглар-биле Тываның ОБЯ-ның штаттыг психологу ажылдаан, ол ажыл уламчылаар.
Аварияның киржикчилери - ийи чолаачы эмнелгеже дуза дилеп келбээн.
Уруглар эмнелгеге понедельникке чедир чыдар, эргежок чугула апарза эмнээшкинни Кызылга уламчылаар. Авария болган хүнде эмнелгеже 18 кижи кирген, оларның 2-зи улгады берген улус. Түңнелинде 7 уругну база бир улуг кижини эмнелгеге чыттырган.
ТР-ниң Өөредилге яамызының эрттирген хыналдазының түңнелинде школаның администрациязының талазындан уруглар аргыштырылгазынга чурум үрээшкини илеревээн. Транспортту айыыл чок чорукту хандырарынга шупту дериг-херексел-биле, ооң иштинде «ГЛОНАСС», тахограф база уругларга тускай олуттар-биле дерээн. Шупту пассажирлер орук шимчээшкининиң дүрүмүн езугаар айыыл чок курлар-биле өөктенип алган турган болгаш, аварияның коргунчуг айыылындан чайлаан.
Тываның Баштыңы Владислав Ховалыг когаралга таварышкан уругларга болгаш оларның дөргүл-төрелинге шупту чогуур ужурлуг дузаны көргүзерин, школа техниказының техниктиг хыналдазын чорударын база ону септээр азы орнун тургузар дугайында шиитпирни хүлээп алырын ТР-ниң Өөредилге яамызынга дааскан.
#Тывачазак #ДТП #Авария #Школачылар #Кадыккамгалал #Шынсолун #Тывадыл
Уруглар болгаш башкызы чогуур эмнээшкинни ап турар.
15 апреля 2023
54