Тываның эрге-чагыргазы тускай шериг операциязының киржикчилеринге болгаш оларның өг-бүлелеринге социал деткимче хемчеглерин калбартып көвүдедип турар.
Чазак хуралынга уруглар садтарынга оларның уругларын тургусканы дээш ачы-дузаның ай санында төлевирлеринден хостаар дугайында шиитпирни хүлээп алган. Деткимче хемчег бо чылдың ийиги кварталындан эгелеп күш кирер.
Республиканың Өөредилге яамызының дыңнадыы-биле алырга, январьның көргүзүүнде, Тываның уруглар садтарынче барып турар 26458 уругнуң 1670-и – ТШО киржикчилериниң ажы-төлү. Школа назыны четпээн уругларның ада-иези азы оларның хоойлу езугаар төлээлери төлевирден хостаар эргезин бадыткаан бөлүк документилерни киирген соонда, өөредилге албан чериниң администрациязы бадылаттынган чурум езугаар төлевирлерден хостаар ужурлуг.
Школа назыны четпээн албан черлеринге уругларның барып турарының дугайында ай санының отчеттарын киирген соонда, республика бюджединиң акша-хөреңгизи-биле уруглар сады дээш чаа чиигелдени эгидип бээр. Регионнуң Өөредилге яамызының эксперттериниң санаашкыннары-биле алырга, 2025 чылда деткимчениң ол хевирин күүседиринге Тывага 51 сая ажыг рубль херек.
Уруглар садының төлевиринден хостаары – ажы-төлдүг ТШО киржикчилериниң өг-бүлелерин деткээн регионалдыг деңнелде өөредилге адырында чаа хемчег. Муниципалдыг уруглар садтарынче ТШО киржикчилериниң уругларын мурнады тургузар чиигелде база барын сагындыраал.
ТР-ниң Чазааның парлалга албаны.
Чингис СААЯНЫҢ тырттырган чуруу.
“Шын” №8 2025 чылдың март 6
