Регионнуң уруглар садтарынга тускай шериг операциязының киржикчилериниң уруг-дарыының ажаалда-хайгааралы дээш төлевирден хостаар дугайында дүрүм бадылаттынган. Тускай шериг операциязының киржикчилериниң өг-бүлелерин деткиир ук хевирни Тываның Баштыңы Владислав Ховалыг саналдаан болгаш, чыл эгезинде Дээди Хуралга Айыткалынга чугаалаан. Республикада ТШО киржикчилериниң 1600 ажыг уруг-дарыы садтарже барып турар.
Дүрүм езугаар ТШО киржикчилериниң ада-ие төлевиринден хостаар дугайында бадыткаан чугула херек документилерни бүрүнү-биле дужааган хүнүнден эгелээш, ада-ие төлевиринден хостаар. Ол дугайында 2025 чылдың февраль 26-да 69 дугаарлыг Тыва Республиканың Чазааның Доктаалы эрге-хоойлу медээлериниң порталында парлаттынган.
ТШО киржикчилериниң өг-бүлелери уруглар садының төлевиринден хостаар дугайында деткимчени алырда, өөредилге организациязының удуртукчузунга дараазында документилерни дужаар:
1) Ада-ие төлевиринден хостаар дугайында билдириишкин;
2) хуузунда медээлерни ажылдап кылырының дугайында чөпшээрел;
3) уругнуң төрүттүнген херечилелиниң хоолгазы азы уруг-биле төрел харылзааны бадыткаан документиниң хоолгазы (адазын илереткен херечилел);
4) Билдириишкин киирген кижиниң документизиниң хоолгазы (паспорт);
5) Ада-иениң бирээзи азы ийилдирзи шериг албанын эрттирип азы тускай шериг операциязының киржикчизи деп бадыткаан документиниң хоолгазы: шериг комиссариадындан азы шериг кезээнден шынзылга, бир эвес амы-тынындан чарылган болза, өлгениниң дугайында херечилел;
6) Ада-иениң болгаш уругнуң чурттап турар чериниң аайы-биле бүрүткеткен документиниң хоолгазы;
7) Өгленишкен (чарылган) дугайында херечилелдиң хоолгазы;
8) Уругну опекун кылдыр азырап алган дугайында бадыткаан документиниң хоолгазы.
Ооң соонда өөредилге организациязының удуртукчузу дужааттынган документилерге үндезилээш, 10-дан хөй эвес хонук дургузунда билдириишкинни ажылдап көөр болгаш, төлевирден хостаан азы ойталаан дугайында шиитпирни үндүрер.
Тургустунуп келген шупту айтырыгларны школа назыны четпээннерниң өөредилге албан чериниң удуртулгазындан айтырып болур.
ТР-ниң Эртем болгаш өөредилге яамызының парлалга албанының медээзи.
Чурукту интернет четкизинден хоолгалаан.
«Шын» №12 2025 чылдың апрель 3