Тыва Республиканың Өөредилге яамызы ада-иелерге «Бүгүдениң өөредилгезин» эрттирген. Ооң кол сорулгазы — интернет четкизинге ажы-төлдү манап болур озал-ондак дугайында ада-иелерге дыңнадыры. Ол озал-ондактар дээрге: кибербуллинг, көгүдери база багай чүүлдерни тарадып суртаалдаары.
Уругларның кибер-айыыл чок чоруунга тураскааткан ада-иелерге республика чергелиг «бүгүдениң өөредилгезинге» полиция ажылдакчылары киришкен. Тыва Республиканың ИХЯ-ның ажылдакчылары республиканың девискээринге ырактан кем-херек үүлгедиишкиннерин болдурбазы-биле хемчеглерни ап турза-даа, нептереңгей онлайн-оюннар дамчыштыр садыг-саарылга-биле холбашкан мөлчүкчү кем-херек үүлгедиглери хөй апарган. Оон аңгыда, Тывада-даа, бүгү Россияда-даа хамаатыларга билдинмес контактылардан мессенджерлер дамчыштыр акша-хөреңги мегелеп алыр таварылгалар көвүдээн. Административтиг албан черлериниң бажыңнарын видеога тырттырарынче азы оларны өрттедиптеринче күткүп, ол дээш акшаны шилчидип бээрин төөредикчилер назы четпээннерге аазап турарлар. Бир эвес ыракта кижилерден акша алыксааш, оларның аайы-биле ындыг чүүлдерни кылыптар болза, хоойлу-дүрүм ёзугаар кеземче херээнге онаажып болур дээрзин ажы-төлге тайылбырлаары чугула.
«Бүгүдениң өөредилгезинге» кибер кем-херек үүлгедиишкиннери дугайында, олардан уруг-дарыгны канчаар чайладып болурун ТР-ниң ИХЯ-ның ажылдакчылары “Сферум” платформазы дамчыштыр тайылбырлааннар.
Социал четкилер дээрге кем-херек үүлгедикчилериниң эң-не чедимчелиг болгаш нептереңгей чепсээ дээрзин утпас болза эки, ынчангаш ада-иелер ажы-төлге интернетке, ылаңгыя танывазы кижилер-биле харылзажырының озалдыын тайылбырлаар ужурлуг.
Ажы-төлүнге дараазында сүмелерни тайылбырлаар:
- чигзинчиг айтыгларны базып болбас;
- кажан-даа, кандыг-даа байдалга хууда медээлерни ажытпас;
- белен ойнап алыышкын дугайында медээлерге бүзүревес;
- ыракта кижилерниң медээлерде бижээн бүгү чүүлдеринге бүзүревес;
- кандыг-бир дыңнадыглар азы саналдар чигзинчиг болза, ада-иезинге дораан дыңнадыр херек!
ТР-ниң ИХЯ-ның медээлеринден.
“Шын” №5 2025 чылдың февраль 13