Эрткен неделяда, октябрь 20-ниң хүнүнде, найысылалдың төвүнде “Фикс прайс” садыының чанынга 2-ден 4 хар чедир назы-харлыг 5–6 хире бичии уруглар эдерткен аныяк херээжен кижини көрдүм. Ол дендии аныяк болгаш бөдүүн кеттинген кижи болду. Бир хар хире бичии чашты эмистиктеп олурар. Элдеп чүүл – эрткен-дүшкен кижилерден арнын чажырар.
Бичии уруглар-биле ажылдап чораан болгаш, сонуургап көргеш: “Бир урууңну меңээ садар сен бе?” — деп, баштактанып айтырарымга, ыыттавады. Ол үеде кудумчуда хөгжүм база дендии дыңналып турган. Ыры дыңнаарынга ынак болгаш, оларны-даа херекке албайн, ынаар чардыга бердим. Красноярскыдан келген православ шажынның улузу ырлажып турдулар. Көрүкчүлер дендии көвей.
Демги чаштарны уттупкаш, арай кежээликтей сактып келдим. Ол та чүү уруглар эдерткен кижи? Та кайыын келген? Ынча көвей кымның ажы-төлү? Ол та чүү артистер? Бажым иштинде айтырыглар-ла хөй. Үе-шаг арай дүвүренчиг апарган болгай. Республикаже кандыг-даа кижилер кирип кээп болур. Оваарымчалыг болбас болза хоржок. Ону үе негеп келген.
Мен ол кижини полиция пунктузунга чугаалаар ужурлуг турган мен. Кайыын келген ынча хөй ажы-төлүл дээрзин хынаар турган. 30 хар иштинде аныяк херээжен кижи арнын чажырар болду. Ол чаштарның салымы дээш полицияга медеглээр чүвемни. Оларны чаңгыс мен эвес, чон база көрген боор. Ах, кончуг-ла таарымчалыг үени эрттирген-дир мен. Ам-даа сураглап болур боор. Чаштар-даа, херээжен кижи-даа орус омактыг бе, азы цыган кижи чадавас. Хоойлу-дүрүм ажылдакчылары бо бөлүктү тып алыр боор.
Мария ТЮЛЮШ.
Кызыл хоорай.
“Шын” №83 2023 чылдың ноябрь 1