2021 чылдын июль 9-та “ТР-ниң Перинаталдыг төвүнге” ховар болуушкун- үш ийис төрүттүнген. Июль 21-де аас-кежиктиг авашкыларны байырлыг байдалга эмчиден үндүр бижээн.
Тываның төөгүзүнде ындыг ховар таварылга чоокта чаа 2017 чылда болган. Хары угда үш кыс база-ла Перинаталдыг төпке төрүттүнген. Олар ам дөрт хар ашкан.
Бо удаада, 33 харлыг Тываның чурттакчызының ийи ажы-төлүнге немей өг-бүлезинде хары угда үш кижи немешкен: ийи кыс, бир оол. Оларның төрүттүнген килдери- 2 кил 270 гр, 2 кил 660 гр база 2 кил 740 гр. Аас-кежиктиг аныяк аваның угунда үш ийистер турганы онзагай. 2013 чылда ооң төрел акызының өг-бүлезинге үш ийис оолдар төрүттүнген.
2021 чылдың июль 21-де Перинаталдыг төптүң удуртулгазы аас-кежиктиг авашкыларны эмнелгеден үндүр бижип тура, ийистерниң авазынга сертификатты тывыскаш, бүгү эмчилер болгаш эмчи сестраларының мурнундан чаштарга быжыг кадыкшылды, а авазынга чаптаныг чаштарын камныг, эки кижилер кылдыр кижизидип өстүрүрерин күзээннер. Үш дакпыр өөрүшкү, аас-кежикке бүргеткен “улуг чүъктүг” ава ам-на бажыңынче чанган.
