Тываның Баштыңының чанында Хамааты инициативаларны деткиир талазы-биле чөвүлелдиң ажылчын бөлүүнүң кежигүннери сумуларже үнүп, республиканың чидиг социал айтырыгларын чурттакчы чон-биле сайгарып чугаалажып, кижилерниң санал-оналдарын кичээнгейге ап, оларны амыдыралга ажыглаар, боттандырар талазы-биле ажылды чорудуп турар.
Тыва Республиканың Чазааның Даргазының оралакчызы Орлан Сарыглар баштаан ажылчын бөлүк Таңды кожуунда Уургайлыг аржаанга кирип, дыштанып турар кижилер-биле барып ужурашкан. Тыва улустуң чаагай чаңчылдарын кадагалап арттырар, оларның үндезининге аныяк салгалды эки мөзү-шынарлыг, ажыл-агыйжы кижилер кылдыр кижизидип өстүрер талазы-биле республикада чорудуп турар ажылдың дугайында ажылчын бөлүктүң кежигүннери чыылганнарга чугаалап бергеннер.
Ужуражыышкынга келген кижилер школачыларның күш-ажыл кижизидилгезинге тыва улустуң ажыл-агыйжы чаңчылдарын калбаа-биле ажыглаары дыка ажыктыг деп демдеглээннер. Школаларның чанынга күш-ажыл лагерьлерин көвүдедир тургузарын, оларны бүдүрүлгеге херек дериг-херекселдери болгаш техника аймаа-биле четчелээрин саналдааннар. Оларның чамдыызы совет үеде чайгы күш-ажыл лагерьлеринге ажылдап дыштангаш, ажыл төлевирин ажылдаан шаа-биле ап турганын сактып чугаалааннар.
Тываның чурттакчыларының социал айтырыгларының бирээзи аржааннар дээрзин ужуражылганың киржикчилери демдеглеп, аржааннарга дыштанырынга таарымчалыг байдалды сөөлгү чылдарда тургузуп, янзы-бүрү социал ачы-дузаны көргүзүп турарын айтып, ооң чижээнге Уургайлыг аржаанны адааннар. Кадыы кошкак болгаш улуг назы-харлыг кижилерни бо аржаанга организастыы-биле эккеп, дыштандырып турар эки чүүл деп айытканнар.